QR Premer-Ministri Asqar Mamin Senat depýtattarynyń saýalyna orai «Jambyl oblysy turǵyndarynyń tabysyn ulǵaitý» pilottyq jobasynyń nelikten qarjylandyrylmaǵanyn túsindirdi, dep habarlaidy "Ult aqparat".
«2019 jyly Jambyl oblysynda pilottyq jobany («Jambyl oblysy turǵyndarynyń tabysyn ulǵaitý») iske asyrý úshin (10 aýdannyń 25 eldi mekeni) jobalardy qarjylandyrýǵa respýblikalyq biýdjetten 2,5 paiyzben 7,2 mlrd teńge, aýyl sharýashylyǵy kooperativteriniń ainalym qarajatyn tolyqtyrý jáne aýyl sharýashylyǵy tehnikasyn 5 paiyzben satyp alý úshin jergilikti biýdjetten shamamen 1,3 mlrd teńge bólindi. Jambyl oblysy ákimdiginiń aqparaty boiynsha pilottyq jobany iske asyrýdyń aralyq nátijeleri: jumyssyzdar sany 48 paiyzǵa nemese 540-qa (1 129-dan 589-ǵa deiin) qysqardy, AÁK alýshylar sany 32 paiyzǵa nemese 490-ǵa (1 539-dan 1049-ǵa deiin) azaidy, ózin-ózi nátijesiz jumyspen qamtyǵandar sany 35 paiyzǵa nemese 640-qa (1 846-dan 1 206-ǵa deiin) kemidi, 2 238 jumyspen qamtylǵandar men jumyssyzdar jeke kásipkerlik bolyp qaita quryldy, 589 jańa jumys orny ashyldy», - dedi ol.
Úkimet basshysynyń atap ótýinshe, osy jobany odan ári iske asyrý maqsatynda oblys ákimdigi ortalyq ýákiletti organdarmen birlesip, «Eńbek» nátijeli jumyspen qamtýdy jáne jappai kásipkerlikti damytýdyń memlekettik baǵdarlamasyna buryn bólingen qaitarymdy qarajatty qaita paidalanýǵa qatysty ózgerister engizý máselesin pysyqtaýda.
«2021 jylǵa arnalǵan respýblikalyq biýdjetten 11,5 mlrd teńge mólsherinde qosymsha qarajat 2021-2023 jyldarǵa arnalǵan respýblikalyq biýdjet jobasynda elimizdiń ekonomikalyq jaǵdaiyna jáne respýblikalyq biýdjettiń múmkindigine bailanysty qarastyrylmady. Bolashaqta, elimizdiń ekonomikalyq jaǵdaiy jáne respýblikalyq biýdjettiń múmkindigi jaqsarǵan jaǵdaida pilottyq jobany iske asyrý úshin respýblikalyq biýdjetten qosymsha qarajat bólý máselesi birinshi kezekte qaralatyn bolady», - dedi Premer-Ministr.
Sonymen qatar ol 2021-2023 jyldarǵa arnalǵan respýblikalyq biýdjet jobasynda aýyl sharýashylyǵy salasyndaǵy ýákiletti memlekettik organnyń shyǵystary aiasynda kásipkerlik bastamalardy qoldaýǵa 2021 jylǵa jalpy somasy 20 mlrd teńge, onyń ishinde Jambyl oblysyna 2,5 mlrd teńge kózdelgenin atap ótedi.
«Bul qarajat «Eńbek» baǵdarlamasyna qatysýshylarǵa kreditter/mikrokreditter berýge baǵyttalǵan aýyldyq eldi mekenderde jáne shaǵyn qalalarda biznes-jobalardy iske asyrýǵa arnalǵan. Aýyl sharýashylyǵyn damytý jáne elimizdiń turǵyndarynyń tabysyn ulǵaitý máseleleri Qazaqstan Respýblikasy Úkimetiniń basym baǵyttarynyń biri bolyp tabylady jáne turaqty baqylaýda», - dedi Asqar Mamin.
