Kvazimemlekettik sektor sýbektileriniń qyzmetin barynsha ońtailandyrý kózdelip otyr. Bul týraly Májilistiń jalpy otyrysynda QR Úkimetiniń 2020 jylǵy respýblikalyq biýdjettiń atqarylýy týraly esebin talqylaý kezinde QR Qarjy ministri Erulan Jamaýbaev málim etti, dep habarlaidy QazAqparat.
«Esepti talqylaý kezinde kvazimemlekettik sektor sýbektileriniń qyzmeti boiynsha eskertýler men usynymdar aityldy. Bul - kompaniialardyń shyǵyndylyǵy, olardyń shottaryndaǵy biýdjet qarajatynyń aitarlyqtai qaldyqtary jáne basqalar.
Memlekettik basqarýdy damytý tujyrymdamasynda kvazimemlekettik sektor sýbektileriniń qyzmetin barynsha ońtailandyrý kózdelgen. Shyǵyndy kompaniialar boiynsha saýyqtyrýdyń arnaiy jospary qabyldanatyn bolady. Eger osy shara uiymnyń nátijelerin jaqsartpasa, onda ol jekeshelendirýdiń, qaita qurylymdaýdyń nemese taratýdyń tiisti josparyna engiziledi», - dedi Jamaýbaev.
Onyń aitýynsha, memlekettik múlikti basqarý tiimdiligin baǵalaý olardyń básekege qabilettiligi, rentabeldiligi, kiristiligi jáne qarjylyq turaqtylyǵy turǵysynan júzege asyrylatyn bolady.
«Esepti talqylaý kezinde Ulttyq qordyń jinaqtaý fýnktsiialaryn kúsheitý máselesi de kóterildi. Osyǵan bailanysty ótken jyly Ulttyq qordyń aktivteri 742 mlrd teńgege óskenin atap ótý kerek. Qordy basqarýdan túsken investitsiialyq kiris 4,1 trln teńgeni qurady. Bul 2019 jylmen salystyrǵanda 2,5 ese kóp. Biýdjet kodeksine engizilgen túzetýlerge sáikes 2024 jyldan bastap kepildendirilgen transfert boiynsha jańa kontrtsikldyq qaǵidany qoldaný josparlanyp otyr. Kepildik berilgen transfert munaidyń konservativtik baǵasy (kesimdi baǵa) kezinde munai sektorynan Ulttyq qorǵa túsetin túsimder mólsherinen aspaityn mólsherde aiqyndalatyn bolady. Bul munaiǵa táýelsiz tapshylyqty tómendetýge jáne Ulttyq qordyń ósýine yqpal etedi», - dedi ministr.
