Májilis depýtattary úkimetke Ulttyq qordan aqsha alýdy doǵarý qajettigin eskertti, dep habarlaidy "Ult aqparat".
«Biýdjetti josparlaý men atqarýdyń keibir ózekti problemalaryna toqtalǵym keledi, al úkimet óziniń aldaǵy jumysynda olardy eskerýi kerek.
Birinshiden, salyq jinaý deńgeii áli de tómen. 2020 jyly biýdjettiń salyqtyq túsimderi 17,4 paiyzǵa azaidy. 2021 jylǵy 1 qańtarǵa biýdjetke jalpy bereshek 378 mlrd teńgeni qurady. KTS (korporativtik tabys salyǵy) avanstyq tólemi 79,9 mlrd teńgeni nemese 2020 jylǵy jeltoqsanda biýdjetke túsken, KTS túsiminiń 18,5%-yn qurady. QQS boiynsha jalpy debittik saldo 1,6 trln teńgeden asty. Joǵaryda atalǵan osy problemalardyń barlyǵy «Salyqtyq ákimshilendirý júiesin reformalaý» baǵdarlamasy aiasynda sheshilýge tiis edi. Osy baǵdarlamany iske asyrýǵa 11 jyl ishinde, milliardtaǵan teńge jumsaldy. Sonda nátije qandai?», - dedi depýtat Úkimet pen Esep komitetiniń 2020 jylǵa arnalǵan respýblikalyq biýdjettiń atqarylýy týraly esepterin qaraý kezinde.
Onyń aitýynsha, Memlekettik kiris komitetiniń 16 aqparattyq júiesinen 12 júiesi aqparattyq qaýipsizdik talaptaryna sai kelmeidi, onyń ishinde 9-y paidalanýǵa engizilmegen. Nátijesinde, salyqtyq jáne kedendik jumysty jaqsartýdan, tek 2020 jyldyń ózinde ǵana túsetin 1,5 trln teńge mólsherindegi qosymsha túsimder túsken joq. Naqty soma 221 mlrd teńgeni qurady.
«Salyqtyq ákimshilendirýdiń álsiz bolýy, biýdjetke Ulttyq qordan qosymsha karjy tartýyna alyp keldi. 2020 jyly respýblikalyq biýdjet kiristeriniń 45%-y Ulttyq qordan transfertter túsimderi. Somasy 4,8 trln teńgeni qurady. Bul – sońǵy jyldardaǵy eń joǵary kórsetkish. Úkimetke bolashaqta, ulttyq qorsyz tek boryshtary ǵana qalýy múmkin ekenin túsinetin ýaqyt keldi. Sondyqtan búgin Ulttyq qor týraly oilamaý, ol eldiń bolashaǵy týraly oilamaýmen birdei», - dedi Amanjan Jamalov.
Budan buryn habarlanǵandai, Parlament palatalarynyń birlesken otyrysynda Qarjy ministri Erulan Jamaýbaev orta merzimdi kezeńde transfert somasy birtindep qysqaratynyn aitty.
