Qystyń tońyn tarqatqan naýryz aiynyń sońynda Astanada ótken «Jas Otan» jastar qanatynyń IV sezi kúlli Qazaqstandaǵy jastardyń kóńilin terbep, armandarǵa qanat bitirdi. Sol arqyly el kelesheginiń otanshyl, memleketshil kózqarasy qalyptasqanyn baiqadyq. Oǵan eki kúndik alqaly jiynda sóz sóilegen delegattardyń oi-pikirleri dálel. Japyraǵy jaiqalǵan Jetisý jerinen baryp qatysqan elýge jýyq delegattyń atynan ár aýdannyń jastary tolǵandyrǵan oilarymen bólisýdi jón kóripti.
Bul kúndi albyrt sezim alyp-ushyp, taǵatsyzdana kúttik. Óitkeni «Jas Otan» jastar qanatynyń IV sezi ótedi» dep belgilengen kún kópshiliktiń úmitin úkilegen edi. Soǵan orai artynyp-tartynyp, qaǵaz-qapshyǵymyzdy túgendep, bas qalaǵa attandyq. Almaty oblysynan shyqqan 44 delegat pen shaqyrylǵan qonaqtyń árbiriniń kózindegi qýanysh, júregindegi elge degen jalyndy sezim airyqsha baiqalady. Poiyzda otyrǵan ár aýdannyń «Jas Otan» JQ atqarýshy hatshylary men jastar jarysa-jarmasa pikir almasyp jatty. Iaǵni, sezden ne kútetini, daiyndyǵy týraly oilarymen bólisip, ózara kókirekterdi terbegen armandaryn áńgimeleidi.
Záýlim saraiy jarqyrap, qyzý tirliktiń qazanyndai qainaǵan Elordanyń kúni kúlimdep, aýa raiy ashyq bolyp turdy. Poiyzdan kútip alǵan uiymdastyrýshylar jastarǵa «Báiterekke» bas suǵyp, «Han shatyrynda» serýendep, Áziret Sultan meshitine kirip, duǵa tilep qaitýyna múmkindik jasapty.
Eki kúnge jalǵasqan sezdiń birinshi kúni delegattar 5 topqa bólinip, «Rýhani jańǵyrý», «Tsifrlyq Qazaqstan», «Qazaqstanda jasalǵan», «Bilim, Ǵylym, Innovatsiia» «Salamatty ult» taqyryptarynda oi qozǵap, óz jobalaryn ortaǵa saldy. Pikirtalas alańdarynda ashyq áńgime ótkizilip, jastardy tolǵandyrǵan máseleler talqylandy. Sondai-aq, jastar saiasatyn damytý joldary keńinen pysyqtalyp, túitkildi máselelerdi sheshý joldary qarastyryldy.
Kelesi kúni Kongress-holl ortalyǵyna jinalǵan myńdaǵan jas dúbirli kúnge orai jinalǵandaryna arqa-jarqa bolyp, tanysyp, bilisip jatty. «Er aitsa eldi aitqany, kóptiń qamyn jep aitqany» degen mátelde aitylǵandai, Kóshbasshymyz Nursultan Nazarbaevtyń jastarǵa arnaǵan salmaqty sózin, qýanyshqa toly quttyqtaýyn QR Memlekettik hatshysy Gúlshara Ábdiqalyqova oqyp berdi. Onda «Jas Otan» Memleket basshysynyń barlyq bastamalary men strategiialyq josparlarynyń senimdi tiregine ainalǵany, bul bedeldi uiym myńdaǵan bilimdi de belsendi jastardyń, Qazaqstannyń naǵyz patriottarynyń basyn biriktirip otyrǵany erekshe atalypty. Prezident jastardy jan-jaqty damýǵa, sportpen, ónermen ainalysýǵa, shet tilderin meńgerýge, otandyq jáne álemdik ádebiettiń bai murasyn tanyp-bilýge, eń bastysy, álemdik deńgeidegi kásibi maman bolýǵa shaqyrdy. Elbasynyń jastarǵa degen qurmeti, janashyrlyǵy ár sózinen bilinip, estigender eriksiz shabyttanyp, erekshe rýhtanyp turdy.
Odan keiin ideialary mol, oilary ushqyr, eńbekke qabilet-qarymyn erekshe salatyn, pikirlerin erkin jetkize alatyn talapty spikerlerdiń jaryssózi bastaldy. Alǵan áserimiz erekshe. Jasta bolsa óz ortasyn moiyndatqan jalyndy jandar óskeleń urpaqtyń bolashaǵyna baǵyt-baǵdar berip, ilgeri basýǵa qozǵaýshy kúsh bolyp qana qoimai, yntymaǵy jarasqan elimizdiń baǵyn asyryp, rýhyn asqaqtatyn, júregi «Otan» dep soǵatyn jastarǵa adastyrmas baǵdarsham boldy. Sol arqyly sezge «Jańa álemge jol salamyz» degen ataýdyń beker qoiylmaǵanyn uǵyndyryp, búgingi urpaqtyń jańashyl bilim men innovatsiiaǵa degen umtylysyn ańǵartty.
Elimizdiń jas urpaǵyna, jas tolqynyna aq jol tilegen, ataly sóz aityp, úlgi-ónege nusqaǵan Elbasymyzben birge bolyp, adal eńbek etsek, áli talaidy tańǵaldyramyz.
Jas júrekterdi toǵystyrǵan kúnniń keleshegi kemel, bolashaǵy jarqyn bolsyn!
Gúlnar Dúskeeva,
«Nur Otan» partiiasy oblystyq filialy saiasi jumys bóliminiń meńgerýshisi
