QR Úkimetiniń otyrysynda túrli jumysshylar sanaty úshin jalpyǵa birdei deklaratsiialaýdyń merzimderi ataldy, dep habarlaidy QazAqparat.
«100 naqty qadam – Ult josparynyń 42-qadamyna sáikes kirister men shyǵystardy jalpyǵa birdei salyqtyq deklaratsiialaý júrgizý kózdelgen. Jalpyǵa birdei deklaratsiialaýdyń maqsaty – jeke tulǵalardyń kiristeri men múlkin baqylaýdyń tiimdi júiesin qurý. Mundai júie kóleńkeli ekonomikaǵa jáne sybailas jemqorlyqqa qarsy kúreske baǵyttalǵan, sondai-aq biýdjetke qosymsha túsimderdi qamtamasyz etýge yqpal etedi», - dedi Qarjy ministri Erulan Jamaýbaev.
Biyl 1 qańtardan bastap deklaratsiiany memlekettik qyzmetshiler jáne olarǵa teńestirilgen tulǵalar men olardyń jubailary tapsyra bastady.
2023 jylǵy 1 qańtardan bastap – memlekettik mekemeler men kvazimemlekettik sektor qyzmetkerleri men olardyń jubailary tapsyrady.
2024 jylǵy 1 qańtardan bastap – zańdy tulǵalardyń basshylary men quryltaishylary, sondai-aq jeke kásipkerler men olardyń jubailary úshin deklaratsiialaý engiziledi.
2025 jylǵy 1 qańtardan bastap - azamattardyń qalǵan barlyq sanattary tapsyrady.
«Azamattarǵa arnalǵan úkimet» MK infraqurylymyn keńeitý boiynsha sharalar qabyldandy. Atap aitqanda, salyqtyq deklaratsiiany qaǵaz túrinde halyqqa qyzmet kórsetý ortalyqtary, memlekettik kirister organdary nemese poshta bólimsheleri arqyly usynýǵa bolady. Korporatsiianyń front-ofisteri «Connection Point» ózine-ózi qyzmet kórsetý sektorymen jabdyqtalǵan.
Halyqqa yńǵaily bolý úshin deklaratsiia tapsyrýǵa elektrondyq qyzmetter – salyq tóleýshi kabineti, «Elektrondyq úkimet» veb-portaly jáne «E-Salyq Azamat» mobildi qosymshasy bar. Turǵyndar elektrondyq tsifrlyq qoltańbany (ETsQ) alýǵa onlain ótinim bere alady, al «Salyq tóleýshiniń kabinetine» sms-kod arqyly ETsQ-syz kirýge bolady», - dep túsindirdi E. Jamaýbaev.
Memlekettik kirister komitetiniń veb-portalynda «Jalpyǵa birdei deklaratsiialaý» bólimi quryldy, onda qajetti aqparat jáne jii qoiylatyn suraqtar boiynsha jaýaptar jinaǵy ornalastyrylǵan.
Aita keteiik, jalpyǵa birdei deklaratsiialaý sharasy tabys salyǵyn azaitýǵa múmkindik beredi.
«Azamattardyń tiisti shyǵystary bolǵan kezde tabys salyǵynyń mólsherin azaitýǵa múmkindik beredi. Deklaratsiialaý kezeń-kezeńimen, memlekettik qyzmetshilerden bastap, keiinnen barlyq azamattar úshin júrgiziledi», - dedi Qarjy ministri.
Sonymen birge, QR Qarjy ministri Erulan Jamaýbaev salyqtyq deklaratsiialaýdyń ońtailandyrylǵan mehanizm jóninde aityp berdi.
«Deklaratsiialaýdy ońailatý maqsatynda deklaratsiialaýǵa tiisti múliktiń tizbesin naqtylaý jáne jyl saiynǵy qysqasha deklaratsiiany berý mindettemesin alyp tastaý boiynsha zańnamalyq sharalar qabyldandy. Endi azamattar deklaratsiiada memlekettik organdarda tirkelgen múlikti jáne ekinshi deńgeili bankterdegi qarajat týraly aqparatty kórsetpeidi», - dep atap ótti ministr.
Onyń aitýynsha, bul derekter avtomatty rejimde ministrliktiń Integratsiialanǵan derekter bazasyna kelip túsedi.
Jalpyǵa birdei deklaratsiialaý júiesine kirgen kezde aktivter men mindettemeler týraly «kiris» deklaratsiiasy usynylady. Deklaratsiiany tapsyrý merzimi: qaǵaz túrinde – 15 shildege deiin, elektrondy túrde – 15 qyrkúiekke deiin.
Deklaratsiiada kólik quraldary, zańdy tulǵadaǵy qatysý úlesteri, shet memlekette tirkelgen jyljymaityn múlik jáne sheteldik bankterdegi aqsha qarajaty týraly málimetter kórsetiledi. Sondai-aq, deklaratsiiada Qazaqstan Respýblikasyndaǵy jáne onyń sheginen tys jerlerdegi múlik týraly derekter, baǵaly qaǵazdar, turǵyn ǵimaratyndaǵy úles, investitsiialyq altyn, ziiatkerlik menshik, avtorlyq quqyq nysandary, ailyq eseptik kórsetkishtiń 10 000 eselengen shegindegi qolma-qol aqsha, debitorlyq/kreditorlyq bereshek jáne jáne quny 1000 ese AEK mólsherinen asatyn basqa da múlikter qamtylady.
«Jalpyǵa birdei deklaratsiialaý júiesine kirgen adamdar keiinnen kiristeri men múlki týraly deklaratsiiany usynýy tiis. Bul rette aktivter men kirister boiynsha ainalymdar bolmasa, kirister men múlik týraly deklaratsiiany usynbaýǵa bolady. «Kiris» deklaratsiiasyn tapsyrý qorytyndysy boiynsha kameraldyq baqylaý júrgiziletin bolady. Sodan keiin zańnamany jetildirý jáne aqparattyq júielerdi pysyqtaý jóninde sharalar qabyldanady», - dedi E. Jamaýbaev.
Otyrys sońynda QR Premer-Ministri Asqar Mamin deklaratsiia tapsyrý qaǵidalaryn halyqqa keń aýqymdy túsindirý qajettigin aitty.
Deklaratsiialaýdyń birinshi kezeńi aiasynda búgingi kúni 437 myńnan astam adam salyq esebin usyndy. Bul josparlanǵan kórsetkishtiń 91% quraidy. Halyq arasynda deklaratsiia tapsyrýdyń eń tanymal tásilderi - «E-Salyq Azamat» mobildi qosymshasy jáne Salyq tóleýshiniń kabineti. Olardyń úlesine barlyq qabyldanǵan deklaratsiialardyń shamamen 95% tiesili.
