Memleket basshysy Qarjylyq monitoring agenttiginiń tóraǵasy Janat Elimanovty qabyldady, dep habarlaidy "Ult aqparat" Aqordanyń resmi saityna silteme jasap.
Kezdesýde Qarjylyq monitoring agenttiginiń tóraǵasy Prezident tapsyrmalarynyń oryndalýyna qatysty atqaryp jatqan jumystary týraly esep berdi. Vedomstvo kapitaldy zańsyz shyǵarýǵa jol bermeý maqsatynda qarjy retteýshilerimen birlesip, kúmándi transshekaralyq aýdarymdarǵa kúsheitilgen monitoring jasaý isin jolǵa qoiǵan.
Qasym-Jomart Toqaevqa biyl toqtatylǵan kúdikti operatsiialardyń sany 3 eseden asqany jáne olardyń jalpy quny 150 mlrd teńgege jýyq ekeni baiandaldy. Osy derekter boiynsha tekserý sharalary júrgizilip jatyr. Agenttiktiń málimeti boiynsha shetelge aqsha qarajatyn shyǵarýdyń kúrt kóbeigeni baiqalmaidy. Kerisinshe biyl shetelge aýdarylǵan qarjy 30 paiyzǵa azaiǵan.
Janat Elimanovtyń aitýynsha, múddeli organdarmen birlesip, qolma-qol valiýtany zańsyz shyǵarýǵa baqylaý kúsheitilgen. Jalpy somasy 5 million AQSh dollaryna jýyq zań buzýshylyq anyqtalǵan.
Sonymen qatar Qazaqstan-qytai shekarasynda tekserý jumystary júrgizilip jatyr. Úsh aptanyń ishinde taýardy zańsyz ákelý faktileri boiynsha 8 qylmystyq jáne 24 ákimshilik is qozǵaldy.
Nátijesinde, taýar importy kóleminiń azaiýyna qaramastan, biylǵy qańtar aiynda biýdjetke túsken kedendik tólemder men salyqtardyń mólsheri 20 paiyzǵa (26,6-dan 31,7 mlrd teńgege deiin) ósti.
Sonymen qatar Memleket basshysyna qoǵamdaǵy mańyzdy áleýmettik máselelerdi sheshýge baǵattalǵan jumystar týraly málimet berildi. Atap aitqanda, «Tarif» jobasy boiynsha kommýnaldyq qyzmetterdiń 17 milliard teńgege ósýine ákep soqtyrýy múmkin 1,3 million azamattyń negizsiz shyǵynyna jol berilmedi. 13 is qozǵaldy (sýmen jabdyqtaý – 8, gazben jabdyqtaý – 3, jylýmen jabdyqtaý – 2).
Prezident jariialaǵan Balalar jyly aiasynda Bala quqyqtary jónindegi ýákilmen birlesip, «Qamqor» jobasy júzege asyrylýda. Bul joba halyqtyń áleýmettik jaǵdaiy tómen toptaryn qorǵaýǵa baǵyttalǵan. Nátijesinde 45 is boiynsha 800 jetim balanyń quqyǵy qorǵaldy.
Kezdesý qorytyndysy boiynsha Memleket basshysy kóleńkeli ekonomikaǵa qarsy kúresý úshin Agenttik tóraǵasyna tiisti sharalar qabyldaý jóninde tapsyrma berdi. Prezident zańsyz iemdelgen aktivterdi, sonyń ishinde shetelden izdeýge basa mán berý qajet ekenin, sondai-aq olardy Qazaqstanǵa qaitarý jumystaryn jandandyrý kerektigin aitty. Bul jumystardyń bári tulǵanyń kim ekenine jáne laýazymyna qaramai júrgizilýge tiis.
