Nur-Sultan qalasyndaǵy №2 kópbeiindi qalalyq aýrýhanasy otbasyn josparlaý ortalyǵynyń ginekolog-endokrinology Aigúl Musabaeva «ekoǵa» qatysýshylardyń jas shekteýine qatysty ózgeristerdi atady, dep habarlaidy QazAqparat tilshisi.
«Ańsaǵan sábi» baǵdarlamasy boiynsha bala súiýge kimniń múmkindigi bar? Bul baǵdarlama boiynsha jasandy jolmen uryqtandyrý ádisin bala súiýge úmitti, reprodýktivti jastaǵy kez kelgen jup paidalana alady. Konservativti jolmen emdeý nátije bermeitin bedeýlik diganozy qoiylǵan patsientterge arnalǵan. «Ekoǵa» otbasylyq juptar da, jalǵyzbasty áielder de qatysa alady. Qazaqstan azamaty bolý jáne patsientterdiń mindetti meditsinalyq saqtandyrýy bolý kerek», - degen maman meditsinalyq saqtandyrý júiesinde «ekoǵa» qatysýshylar qandai kriteriimen irikteletinin aitty.
«Eń birinshi reprodýktivti jastaǵy patsientter, erler faktoryna bailanysty bedeýlik, áieldiń jatyr tútiksheleriniń ekeýi de bitelgen jaǵdaida nemese otamen alynǵan kezde hirýrgiialyq gisteroskopiia, laparoskopiia, em-shara nátijesi bolmaǵan kezde «ekoǵa» júgine alady. Gormonaldy emdeý nátijesiz bolǵan bedeýlik túri de «ekoǵa» jatady. Joǵary tehnologiialardyń bárin paidalansa da, bir jyldan asa bala kótere almaýdyń belgisiz genezi de «eko» jasatýǵa negiz bolady. Jambas músheleriniń endometriozyna bailanysty bedeýlik te «ekoǵa» jatady», - dedi ginekolog-endokrinology.
Mamannyń málimeti boiynsha, ekouryqtandyrýǵa qatysatyn áielderdiń jasyna qatysty shekteý alynǵan.
«Densaýlyq saqtaý ministrliginiń №272 buiryǵy boiynsha kvota berý múmkindigi keńeidi. Buryn úmitkerlerdiń jasy 42 jasqa deiin shekteýli bolǵan. Jańa buiryq boiynsha áiel reprodýktivti jasta bolýy kerek. Osy atalǵan kórsetkishter burynǵy buiryqta bolmaǵan. Sondyqtan bul «ekoǵa» úmitkerlerdiń sanyn arttyrady», - dedi Aigúl Musabaeva.
