Jalǵan ýrbanizatsiia úderisi qalalardyń damýyna kedergi bolmaýy kerek. «Ekonomikalyq zertteýler institýty» AQ Basqarma tóraǵasynyń orynbasary Baýyrjan Muqan osyndai pikir bildirdi, dep habarlaidy QazAqparat.
«QR Prezidenti Qasym-Jomart Toqaev Qazaqstan halqyna arnaǵan Joldaýynda ýrabanizatsiia, óńirlerdi damytý tóńiregindegi mańyzdy máselelerdi kóterdi. Máselen, elimizde ýrbanizatsiianyń deńgeii 2014 jyly 56,6% bolsa, qazirgi tańda 58,9%-dy quraidy. Jalǵan ýrbanizatsiia úderisi qalalardyń damýyna kedergi bolmaýy qajet. Demek, áleýmettik, injenerlik, kóliktik infraqurylymǵa qosymsha júkteme túsirmei halyqtyń tabiǵi ósimin negizge ala otyryp, infraqurylymdyq qamtamasyz etý saiasaty júzege asyrylýy tiis. Sebebi joǵary sapaly qoljetimdi infraqurylymdardyń damýy halyqtyń sapaly ómir súrý jaǵdaiyna tikelei áser etedi», - deidi «Ekonomikalyq zertteýler institýty» AQ Basqarma tóraǵasynyń orynbasary.
Sondai-aq, Baýyrjan Muqan Joldaýda aitylǵan territoriialyq damýdyń jańa satysy – el ekonomikasyna oń áser tigizetinin atap ótti.
«Joǵary tehnologiialyq damý sektorynyń Qazaqstan ekonomikasyndaǵy úlesi 2-3% ǵana. Árine, bul óte tómen kórsetkish. Sondyqtan, ǵylym men tehnologiianyń damýyna barlyq óńirlerdiń jappai jumyldyrylýy nemese innovatsiialyq ortanyń birdei qalyptasýy ekitalai. Al, Memleket basshysynyń Shyǵys Qazaqstan, Qaraǵandy jáne Pavlodar oblystarynyń joǵary tehnologiialar, ǵylymi aýqymdy óndiristiń jáne tehnikalyq qyzmettiń ortalyǵy bolýyna qatysty pikiri osy óńirlerdiń úlken múmkindikteri bar ekendigin aiqyndap otyr», - dep túiindedi Baýyrjan Muqan.
