Jalǵan shot-faktýralar boiynsha zalal somasy 183 mlrd teńge bolatyn 618 qylmystyq is qozǵaldy. Bul týraly QR QM Memlekettik kirister komitetinen málim etti, dep habarlaidy QazAqparat.
QR Qarjy monitoringi agenttigi buǵan deiin «AiDi stroi» JShS-nyń basshysy D.Qurmanǵojinovanyń zańsyz áreketterinen memleketke 900 mln teńge kóleminde iri zalal keltirilgenin málim etken bolatyn.
«Bul áreketterdi direktor JShS atynan býhgalterlik qujattarda jalǵan qyzmetter men taýar jetkizilimin kórsete otyryp, 54 tapsyrys berýshiniń atyna jalǵan shot-faktýralar jazyp berý arqyly júzege asyrǵan.
Osy jalǵan mámileler arqyly tapsyrys berýshiler salyq eseptiligindegi shyǵyndardy zańsyz arttyryp, salyq mindettemelerin azaitqan.
Sot sheshimi zańdy kúshine engennen keiin Memlekettik kirister organdary kameraldyq baqylaý nemese salyq aýditi sheńberinde talap qoiý merzimi sheginde tólenbegen salyqtardy tapsyrys berýshilerden talap etedi.
Sonymen qatar memlekettik kirister organdary jalǵan shot-faktýralardy paidalaný arqyly jasalǵan quqyqqa qarsy is-áreketterdiń jolyn kesý boiynsha aldyn alý sharalaryn turaqty negizde qabyldaidy», - delingen QR QM Memlekettik kirister komitetiniń habarlamasynda.
Aita keteiik, adal básekelestikti qorǵaý, «jalǵan mámilelerdi» erte anyqtaý maqsatynda 2019 jyldan bastap táýekelderdi basqarý júiesin paidalana otyryp, táýekeli joǵary salyq tóleýshiler boiynsha elektrondy shot-faktýralardy jazyp berýdi shekteý jónindegi pilottyq joba iske qosyldy. Bul maqsat ziiatkerlik taldaýdy qoldana otyryp, elektrondyq shot-faktýralardyń málimetterin taldaý arqyly júzege asyrylady.
Bul adal bizneske ózderin «bir kúndik» firmalarmen bailanystan qorǵaýǵa kómektesedi, aitarlyqtai ziian keltirý jáne uzaq ýaqyt ótkennen keiin ósimpuldardy eseptei otyryp salyq tóleý qaýpin azaitady.
«Búgingi tańda 8 myń salyq tóleýshige EShF jazý múmkindigi shektelgen, mundaǵy táýekel ainalymynyń somasy 3,3 trln teńge.
Budan ári, narazylyq-talap qoiý jumysy júrgizilýde, onyń nátijesinde búginde 529 mlrd teńgege EShF jazǵan mekemelerdiń tirkelýi jaramsyz dep tanyldy, 160 mlrd teńge mámileleri jaramsyz dep tanyldy. Qazaqstan Respýblikasy Qylmystyq kodeksiniń 216-baby boiynsha zalal somasy 183 mlrd teńge bolatyn 618 qylmystyq is qozǵaldy», - dep habarlady Memlekettik kirister komitetinde.
