Foto: depositphotos.com
Aqmola oblysy prokýratýrasy jalǵan diplomdardy paidalaný deregin anyqtady, - dep habarlaidy "Ult aqparat" vedomstvonyń baspasóz qyzmetine silteme jasap.
"Memleket aýyldyq jerlerge jas mamandardy tartýǵa erekshe nazar aýdarady jáne qomaqty biýdjet qarajatyn bóledi. Osy maqsatta, 2009 jyldan bastap búkil el boiynsha «Diplommen aýylǵa» memlekettik baǵdarlamasy iske asyrylyp jatyr. Ol aýyldyq jerde eńbek etýge niet bildirgen mamandarǵa jeńildikpen kreditter men óteýsiz járdemaqylar alýǵa múmkindik beredi.
Sońǵy jyldary elimizdiń aýyldyq jerlerinde kadr tapshylyǵy edáýir teńestirildi, alaida jekelegen adamdar «maman» degen atpen jeńildikti sharttardy paidalana otyryp, biýdjet qarajaty esebinen zańsyz baiytylyp jatyr.
Oblys prokýratýrasy baǵdarlama sheńberinde áleýmettik qoldaý sharalaryn usyný kezinde qoldanystaǵy zańnamanyń saqtalýyna taldaý júrgizdi" - delingen habarlamada.
Onyń nátijesi boiynsha jalǵan diplomdardyń kómegimen jeńildikter alǵan jáne sharttyq mindettemelerdi buzǵan adamdar anyqtalǵan.
Máselen, 2021 jyly K. esimdi azamat jalǵan diplommen Atbasar aýdanynyń oqý ornyna biologiia pániniń muǵalimi bolyp jumysqa ornalasqan. Al 2022 jyly múliktik igilikter alý maqsatynda sol jalǵan diplomdy paidalanyp, baǵdarlamaǵa qatysqan. Osylaisha 4,9 mln teńge alǵan.
Aita ketý kerek, K. 2 jyl boiy osy salada quzyretti bolmasa da, balalardy oqytqan.
"Osyndai shemany bilim berý salasyndaǵy taǵy 12 «maman» paidalanǵan. Zalaldyń jalpy sommasy 30 mln teńgeden asty.
Jalpy aitqanda, mundai «mamandy» jalǵan diplommen jumysqa ornalastyrý jas urpaqtyń bilim deńgeiine teris áser etedi jáne biýdjet qarajatyn urlaýǵa jaǵdai jasaidy.
Qazirgi tańda qylmystyq qýdalaý organdary tergeý is-sharalaryn júrgizip jatyr. QR QPK-niń 201-babynyń talaptaryna sáikes ózge de aqparat jariia etýge jatpaidy" - delingen vedomstvo habarlamasynda.
