Foto: Aqordanyń baspasóz qyzmeti
Jaqyp Asanov Senat tóraǵasynyń orynbasary bolyp taǵaiyndaldy, - dep habarlaidy "Ult aqparat".
Palata tóraǵasynyń orynbasary kandidatýrasyn spiker Máýlen Áshimbaev usyndy. Depýtattar Senat tóraǵasynyń usynysyn qoldady.
«Senimińizge rahmet. Bul – zor jaýapkershilik. Men muny túsinemin. Sondyqtan óz mindetimdi oryndaý úshin bar bilimimdi, tájiribemdi jumsaýǵa daiynmyn», – dedi Asanov.
Jaqyp Qajmanuly 1963 jyly 17 tamyzda Qyzylorda qalasynda dúniege kelgen.
Kirov atyndaǵy Qazaq memlekettik ýniversitetin bitirgen. Zań ǵylymdarynyń kandidaty.
Ýniversitetti bitirgennen keiin Qyzylorda oblystyq advokattar alqasynda taǵylymdamadan ótti. 1985-1986 jyldary Qyzylorda oblysynyń prokýratýra organdarynda oblys prokýrorynyń kómekshisi, aǵa kómekshisi jáne oblystyq prokýratýrada bólim bastyǵy qyzmetterin atqardy.
1993-1994 jyldary - Qazaqstan Respýblikasy Bas prokýratýrasynyń Jalpy qadaǵalaý basqarmasynyń aǵa prokýrory, Qazaqstan Respýblikasy Bas prokýratýrasynyń Jalpy qadaǵalaý basqarmasynyń Bankter, qarjy-nesie qatynastary týraly jáne tekserý organdaryndaǵy zańnamanyń saqtalýyn qadaǵalaý bóliminiń bastyǵy.
1994-1996 jyldary - Qazaqstan Respýblikasy Prezidenti Ákimshiliginiń Zańdylyq, quqyqtyq tártip jáne sot reformasyn qamtamasyz etý bóliminiń konsýltanty, sektor meńgerýshisi. 1996-1997 jyldary - Ońtústik Qazaqstan oblysy boiynsha Salyq politsiiasy basqarmasy bastyǵynyń birinshi orynbasary.
1997-2001 jyldary - Qazaqstan Respýblikasy Bas Prokýrorynyń aǵa kómekshisi - Áleýmettik-ekonomikalyq saladaǵy zańdylyqty qadaǵalaý basqarmasy bastyǵynyń orynbasary, osy Basqarmanyń bastyǵy, Qazaqstan Respýblikasy Bas prokýratýrasynyń Memlekettik organdar qyzmetindegi zańdylyqty qadaǵalaý departamentiniń bastyǵy. 2001-2002 jyldary - Almaty qalasy prokýrorynyń birinshi orynbasary.
2002-2003 jyldary - Pavlodar oblysynyń prokýrory. 2003-2005 jyldary - Qazaqstan Respýblikasynyń Ádilet vitse-ministri. 2005-2007 jyldary - «Atameken» Qazaqstan kásipkerleri men jumys berýshileriniń jalpyulttyq odaǵy atqarýshy direktorynyń orynbasary, «Qazaqstan kommýnaldyq júieleri» AQ direktorlar keńesiniń tóraǵasy.
2006-2007 jyldary - «Ordabasy» korporatsiiasy» AQ prezidenti jáne direktorlar keńesiniń múshesi. 2007-2011 jyldary - IV sailanǵan Qazaqstan Respýblikasy Parlamenti Májilisiniń depýtaty. 2012 jyly qańtar- qyrkúiek - V sailanǵan Qazaqstan Respýblikasy Parlamenti Májilisiniń depýtaty. 2012-2017 jyldary QR Bas prokýrorynyń orynbasary. Bas prokýrory. 2017-2022 jyldary QR Joǵary sotynyń tóraǵasy bolǵan.
«Qurmet» ordenimen; «Qazaqstan Respýblikasynyń táýelsizdigine 10 jyl» medalimen; «Qazaqstan Respýblikasy prokýratýrasynyń qurmetti qyzmetkeri» tósbelgisimen marapattalǵan.
