Qazaqstan sot, prokýratýra men quqyq qorǵaý salasynda tyń ideialar men jobalardy júzege asyratyn «reformatorlar komandasyn» qurýǵa qol jetkizdi. Bul týraly Astanada ótip jatqan «Qazaqstandaǵy qylmystyq sot tóreliginiń bolashaǵy: izgilendirýden ózgeristerdi basqarýǵa ótý» atty halyqaralyq konferentsiia barysynda QR Joǵary Sotynyń tóraǵasy Jaqyp Asanov málim etti, dep habarlaidy QazAqparat tilshisi.
Atalmysh halyqaralyq konferentsiia Eýropalyq odaqtyń úshjyldyq «Qazaqstandaǵy qylmystyq sot tóreligin jetildirý» jobasynyń qorytyndysyna arnalyp otyr (EUCJ). Konferentsiianyń maqsaty - EUCJ jobasynyń qorytyndysyn saralap, sot júiesin, prokýratýra jáne politsiia organdaryn jetildirýdiń aldaǵy strategiiasyn talqylaý bolyp otyr.
Jiynda sóz sóilegen QR Joǵary Sotynyń tóraǵasy Jaqyp Asanov EUCJ jobasyn júzege asyrǵan mamandarǵa alǵys aitty. Onyń sózine qaraǵanda, EUCJ jobasy aiasynda túrmedegilerdiń sanyn azaitýdyń 10 sharasy, azamattyq protsess barysyndaǵy tatýlastyrý, elektrondy brasletter men probatsiia, koloniialardaǵy adamdardy jumyspen qamtý sharýalary júzege asyrylǵan.
«Birinshiden, biz «reformatorlar komandasyn» qura aldyq. Reformatorlar komandasy Bas prokýrordyń buiryǵymen quryla salǵan joq. Olar - shynaiy kóńilmen elge qyzmet etýdi oilap shyqqan adamdar. Reformatorlar komandasy, ásirese menedjment salasynda kóptiń kózin ashty. Bizdiń jobalyq keńseni qurǵanymyzdy bilesizder. Dál sol jerde tyń ideialar týyndap, bizdiń qadamdarymyz aiqyndaldy. Sonymen birge, ózimizdiń ideialardy aimaqtarǵa jetkizý mindeti tur edi. «Tyń ózgeristerdiń elshilerin» daiyndaý mindeti de júktelgen edi. Osylaisha, eki-úsh prokýrordan turatyn shaǵyn komandany ázirlep, ol jas mamandar jumysqa degen qushtarlyqpen aimaqtarǵa attanyp, úlken jumystar atqardy», - deidi Jaqyp Asanov.
Sózin jalǵastyra kele QR Joǵary Sotynyń tóraǵasy EUCJ jobasy aiasynda atqarylǵan sharýalar týraly keńirek aityp berdi.
«Men bir joba týraly ǵana aita keteiin. «Túrmedegilerdiń sanyn azaitýdyń 10 sharasy» arqyly ǵana Qazaqstan TMD ǵana emes, odan da aýqymy keń memleketterge reformalaryn pash etti. Ótken jyly Resei Federatsiiasynyń Úkimeti jobalyq basqarý turǵysynda baiqaý jariialaǵan bolatyn. Biz de ol baiqaýǵa ótinim bildirip, Máskeýden kelgen baǵalaýshylar bizdiń qujattardyń qanshalyqty jemisti ekenine kózderi jetip, qorytyndylarymyzdy zerttedi. Osydan keiin bizdiń komanda Máskeýge baryp, jobany joǵary deńgeide qorǵap, aqyry biz Gran-pri utyp aldyq. Osylaisha, biz jobalyq menedjmenttiń - Sberbank, Rosatom, Belgorod oblysynyń ákimshiligi sekildi alpaýyttarymen iyq tiresetin dárejege jettik», - dedi Jaqyp Asanov.
QR Joǵary Sotynyń tóraǵasy jalpy Máskeýdegi baiqaýǵa bes joba joldanyp, onyń bári de júldeli oryndy ielengenin aityp ótti.
