Atyraý oblysynda 1-8 aqpan aralyǵynda «Spýtnik V» vaktsinasyn 833 adam aldy. Onyń ishinde meditsina salasynyń 794 qyzmetkeri bar. Solardyń qataryndaǵy №7 qalalyq emhananyń direktory Gúlnafis Tańbaeva vaktsina saldyrǵannan keiingi óziniń kóńil-kúii jáne vaktsinatsiianyń mańyzy týraly aityp berdi, dep habarlaidy QazAqparat.
Onyń málimetinshe, №7 emhanada 250-den astam adam jumys isteidi. Qazir olardyń 10%-dan astamy vaktsina alyp úlgergen.
«Meditsina salasynda jumys istegenime 25 jylǵa jýyqtady. Osy kezeńde halyqtyń densaýlyǵyn saqtaý, túrli aýrýdyń aldyn alý úshin de, meditsina isin uiymdastyrýshy retinde de turǵyndarmen tyǵyz bailanys ornatyp kelemin. Óitkeni, ózge salalarǵa qaraǵanda meditsina qyzmetkerleri adamdarmen kóbirek aralasady. Sozylmaly aýrýy bar jandar, jalpy turǵyndar dárigerlerge kóbirek júginedi», - deidi Gúlnafis Tańbaeva.
Onyń aitýyna qaraǵanda, pandemiia tirkelgen kúnnen beri halyqtyń dárigerlerge degen senimi arta túsken. Koronavirýs infektsiiasy dendep, naýqastar qinalǵan sátte aldymen dárigerler kúni-túni migirsiz eńbek etti.
«Qaýipti virýspen betpe-bet kúresken dárigerler de, orta býyn qyzmetkerleri de infektsiia juqtyrdy. Biraq, meditsina qyzmetkerleriniń mindeti – naýqastyń ómirin saqtap qalý. Árine, birinshi tolqyn kezinde indetten qorǵaityn vaktsina bolmady. Soǵan qramastan, salanyń barlyq qyzmetkeri indetke shaldyqqan jandardyń ómiri úshin kúresti.
Kez kelgen infektsiiany toqtatýdyń da, onyń aldyn alýdyń da bir joly – vaktsina saldyrý. Vaktsina aldymen infektsiiadan qorǵaidy. Sol sebepten, ózim vaktsinany alǵashqylardyń qatarynda aldym. Nege? Óitkeni, ózimdi, otbasym men ainalamdaǵy áriptesterimdi, emhanalaǵa keletin adamdardy qaýipti virýstan qorǵaýym qajet. Sondyqtan, jaqynyńa, janyńda júrgen jandarǵa janashyr bolý úshin vaktsina alýdan qorqýdyń qajeti joq», - degen oiymen bólisti Atyraý qalasyndaǵy №7 emhana direktory Gúlnafis Tańbaeva.
Dárigerdiń pikirinshe, osy oraida ár adam qoǵam aldyndaǵy jaýapkershilikti sezinýi kerek. Bul – qaýipti virýsty taratpaý.
«Bul úshin taǵy da qaitalap aitaiyn, vaktsina alýdan qoryqpai, erikti túrde saldyrǵan jón. Vaktsinadan keiin ózimde de, áriptesterimde de janama áser bolǵan joq. Kúndelikti jumysyma kelip júrmin. Áriptesterim de jumysynan qalǵan joq. Demek, vaktsinanyń adam aǵzasyna keri áseri joq deýge bolady» - deidi ol.
