Sport delegatsiialary ushyp keletin resmi oryn – Almaty halyqaralyq áýejaiy 2017 jylǵy Qysqy ýniversiada aiasynda sport delegatsiialaryn qarsy alýǵa tolyǵymen daiyn. Ýniversiada-2017 Direktsiiasynyń basshylyǵy atletterdiń Almaty halyqaralyq áýejaiyna kelý kestesi jáne olardy qarsy alý rásimi jóninde óz túsiniktemelerin berdi.
«Qysqy oiyndarǵa qatysatyndardyń shamamen 90%-y Almaty qalasynyń áýejaiyna tikelei halyqaralyq reispen jetedi. Taiaý kúnderi Qazaqstannyń ońtústik astanasyna 300-den asa sheteldik delegat ushyp keledi. Ýniversiada 2017 qatysýshylarynyń ushyp kelý sany jaǵynan áýejaidyń 26-29 qańtar aralyǵyndaǵy kestesi óte tyǵyz bolmaq. Almaty áýejaiynda kútip alynatyn Ýniversiada qatysýshylarynyń jalpy sany – 2823. Sportshylar qalamyzǵa kelgen alǵashqy sátten bastap olarǵa qonaqjailylyǵymyz ben yqylasymyzdy kórsetý úshin jarystardyń aldyndaǵy sońǵy aptada bizdiń mindetimiz -búkil máselelerdi búge-shegesine deiin pysyqtap shyǵý», - dep atap ótti 2017 jyly Almatyda ótetin 28-shi Dúniejúzilik qysqy ýniversiadaǵa daiyndalý jáne ótkizý jónindegi direktsiia basshysy Nail Nýrov.
Almaty áýejaiynyń jerústi qyzmetteri Ýniversiada-2017 jarystaryna qatysý úshin ushyp keletin sheteldik jáne jergilikti delegatsiialardy qarsy alý tásilderin pysyqtap, jetildirdi. Pasporttyq jáne kedendik baqylaý júiesi de aitarlyqtai ońtailandyryldy: Qysqy ýniversiada qatysýshylaryna arnap pasporttyq baqylaýdan ótý úshin jeke kabinalar jáne de kedendik rásimderden ótý úshin jeke dáliz usynylady, sondai-aq, ushyp kelý zalynda deklaratsiialardy toltyrý úshin ústelder sany arttyryldy. Osy telimderde jumys jasaityn qyzmetkerlerdiń sany da ulǵaitylmaq. Qaýipsizdik sharalary is-sharanyń halyqaralyq mártebesine sáikes uiymdastyrylyp otyr.
Ýniversiada qatysýshylarynyń júgi olarǵa aldyn ala jiberilgen arnaiy júk birkasymen belgilenedi. Arnaiy júk birkasyna qarap Ýniversiada qatysýshylarynyń júgine birinshi kezekte qyzmet kórsetiledi.
Almaty áýejaiyndaǵy navigatsiia júiesi orys, qazaq jáne aǵylshyn tilderinde kórsetilgen. Ushyp kelý zaldary men jolaýshylar ornalasatyn kópshilik aimaqtar Ýniversiada-2017 stilistikasynda bezendendirildi.
Ýniversiada qonaqtary men qatysýshylary ózderin jaily sezinýi úshin Almaty áýejaiynda aqparattyq ústelder qyzmet jasamaq, onda jalpy kólik qyzmeti, kelý jáne attaný kezindegi tasymaldaý kesteleri, resmi kóliktiń qozǵalys baǵyty týraly aqparat alýǵa bolady. Aǵylshyn tilin erkin meńgergen eriktiler men aqparattyq ústelderdiń janyndaǵy kólik menedjerleri qonaqtarǵa Almatyǵa jetken ýaqytynda jol kórsetip, kómektesetin bolady.
