Aqparat jáne qoǵamdyq damý ministri Dáýren Abaev jaqyn arada kóptiń kóńilinen shyǵatyn latyn qarpindegi qazaq álipbiiniń jańa nusqasy tanystyrylyp qalýy múmkin dedi, dep habarlaidy QazAqparat.
«Álipbi – tek grafika emes, bizdiń ulttyń bolashaǵy. Ol – mádeni kodtyń bir bólshegi, kommýnikatsiia quraly. Sondyqtan, bul máselege kelgende asyqpai, ańdap basý kerek. Latyn qarpine kóshýde úzdik úlgi retinde Túrkiia memleketi jii aitylady. Alaida kópshilik jańa álipbidi engizý úshin Túrkiia otyz jyl boiy tynymsyz jumys júrgizgenin eskere bermeidi. Atatúrik kezinde syrtqy da, ishki kúshterden orasan zor qarsylyqqa tap bolǵan. Bilýimshe, ol tipti el aralap, bul sheshimniń qanshalyqty mańyzdy ekenin túsindirýmen bolǵan. Bizge olai etýdiń qajeti joq. Sebebi qazaq tilinde sóileitin azamattardyń asa basym bóligi latyn qarpindegi qazaq álipbiine kóshý bastamasyn qos qolyn kótere qoldap otyr», - dedi Dáýren Abaev «Ashyq dialog» baǵdarlamasynda.
Ministrdiń aitýynsha, jańa álipbige qatysty pikirtalastar barshylyq. Dese de, olar tehnikalyq sipattaǵy máseleler ǵana ekenin eskerý kerek.
«Pikirtalastardyń bolǵany da durys. Bul degenińiz kópshiliktiń til taǵdyryna bei-jai qaramaitynyn bildiredi. Qazaq tiliniń jańa álipbii boiynsha lingvister de, tiltanýshylar da, tipti IT-mamandar da jumys júrgizip jatyr. Sondyqtan kei suraqtar boiynsha qaishylyqtyń bolǵanyna asa tańǵalýdyń reti joq. Bul niýanstardyń barlyǵyn Elbasy da, Prezidentimiz Qasym-Jomart Toqaev ta bilip otyr. Mine, osy sebepti atalǵan baǵyttaǵy jumysty jalǵastyrýǵa pármen berildi. Meniń oiymsha, jaqyn arada barlyǵynyń – oqýshylardan bastap professorlarǵa deiin kóńilinen shyǵatyn jańa nusqa tanystyrylady», - dedi Dáýren Abaev.
Eske sala ketsek, osydan birneshe kún buryn Memleket basshysy Qasym-Jomart Toqaev Mádeniet jáne sport ministri A.Raiymqulovaǵa jańa álipbidi jetildirý jóninde tapsyrma berdi. Bul týraly QR Prezidenti óziniń Twitter-degi paraqshsynda jazdy.
