Qazaqstannyń kieli jerleriniń geografiiasy boiynsha 600 nysan belgilendi. Bul týraly búgin Prezident janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiianyń úshinshi otyrysynda QR Prezidenti Ákimshiliginiń basshysy - Ulttyq komissiianyń tóraǵasy Ádilbek Jaqsybekov málim etti, dep habarlaidy QazAqparat.
"Sońǵy tórt aida Elbasy usynǵan baǵdarlamany júzege asyrýda naqty qadamdar jasaldy. Ortalyq jáne jergilikti memlekettik organdar bul baǵyttaǵy jumysqa belsendi qatysyp jatyr, sondai-aq oblystarda arnaiy komissiialar, jobalyq keńseler, sarapshylyq toptar quryldy. Ortalyq jobalyq keńseniń jumysymen jańa tanysyp shyqtyq. Ózderińiz kórdińizder, kóp jumys jasalǵan. Ulttyq komissiianyń arnaiy toptary jumysynyń alǵashqy nátijeleri bar. Biz osy sharalardy uiymdastyrýda jańa deńgeige shyqtyq», - dep atap ótti Á. Jaqsybekov.
Taratylǵan málimetterge qaraǵanda, Jobalyq keńse jumysyn bastaǵannan beri ministrlikter men ákimdikter usynǵan 1170 jobany pysyqtady.
«Sonymen búginde jańa álipbidiń jobasy jasaldy. Qazaqstannyń kieli jerleriniń geografiiasy boiynsha 600 nysan belgilendi. Olardyń 22-sinde ǵylymi-restavratsiialyq jumystar bastaldy. Týǵan jer baǵdarlamasy boiynsha keń kólemde jumystar júrgizilip jatyr. Mádeniet baǵytynda eń úzdik shyǵarmalar tańdap alyndy», - dedi ol.
Sonymen qatar Á. Jaqsybekov «Jańa gýmanitarlyq bilim. Qazaq tilindegi 100 jańa oqýlyq» jobasy aiasynda gýmanitarlyq pánder boiynsha 17 oqýlyqtyń tizimi jasalǵanyn jáne olarǵa aýdarma jasaý sharalary bastalǵanyn atap ótti.
«Bul osy jumystyń basy ǵana. Barlyq baǵyttar boiynsha josparly maqsattar bar. Ony qoǵam qoldap otyr. Keleshekte úlken jumystar atqarylady. Elbasynyń «Rýhani jańǵyrý» baǵdarlamasy jalpyulttyq jobaǵa ainalýy kerek»,-dep túiindedi sózin ol.
Belgili bolǵandai, «Jahandaǵy zamanaýi qazaqstandyq mádeniet» jobasy boiynsha úzdik týyndylardyń tizimi jasaldy. Oǵan ádebiet salasyndaǵy 216, «teatr, kino jáne horeografiia» janryndaǵy 48, beineleý óneri boiynsha 182 jáne mýzyka salasyndaǵy 200-den astam shyǵarma endi.
Budan bólek, «Qazaqstandaǵy 100 jańa esim» jobasyna 1500 ótinim kelip tústi, olardy ary qarai ashyq daýys berýge usynylatyn aralyq pýldar bolady.
