Saakashvilidiń Grýziiaǵa oralǵannan keiin 20 kún ishinde bolǵan oqiǵalar.
Grýziianyń burynǵy prezidenti Mihail Saakashvili áskeri gospitalǵa aýystyryldy, ol 50 kúnge sozylǵan ashtyq aktsiiasyn toqtatady. Bul jóninde onyń zańgeri men dárigeri habarlady.
19 qarasha túnde, ómiri men densaýlyǵyna qaýip tóngeni jaily aqparat jiilegen shaqta saiasatker túrmeden Gori qalasyndaǵy áskeri aýrýhanaǵa jetkizilgen. Onyń aldynda zańgeri Nika Gvaramiia 53 jastaǵy saiasatker ózin áskeri aýrýhanaǵa áketse, ashtyq aktsiiasyn toqtatatynyn aitty degen.
"Saakashvili ózin Gori áskeri aýrýhanasyna aýystyrýǵa kelisti jáne sol jaqqa jetkizilgennen keiin ashtyq aktsiiasyn aiaqtaidy" dedi Gvaramiia.
Onyń jeke dárigeri Nokoloz Kipshidzeniń aitýynsha, Saakashvili aýrýhananyń reanimatsiia bólimine jatqyzylǵannan keiin birneshe analiz tapsyrǵan. Dáriger onyń jaǵdaiyn "turaqty biraq aýyr" dep baǵalaidy.
Bir kún buryn túrme aýrýhanasyna advokaty barǵan kezde Saakashvili esin joǵaltqan. Qoǵamdyq qorǵaýshylar keńsesi qurǵan meditsinalyq sarapshylar tobynyń aitýynsha, saiasatkerdiń asqazany jáne júikesi aýyrady.
Mihail Saakashvili qyrkúiektiń sońynda – jergilikti atqarý organyn sailaý qarsańynda eline oralǵan. Ol azamattardy sailaýǵa barýǵa úndep, sailaýdyń ertesinde Tbilisi ortalyǵyna jinalýǵa shaqyrǵan. Alaida artynsha qamaýǵa alynyp, saiasatker ashtyq jariialady. Oǵan prezident bolyp turǵanda, qyzmetin asyra paidalandy degen aiyp taǵylǵan. Qazir onyń ústinen taǵy bir is qozǵaldy.
Saakashvili ózine qarsy qozǵalǵan qylmystyq isterdi jabýdy talap etti. Keiin ashtyqtan densaýlyǵy nasharlap, ózin kádimgi aýrýhanaǵa jetkizýdi surady. Alaida saiasatkerdiń emdeý jóninde talaby kópke deiin oryndalǵan joq.
Oppozitsiia Saakashvili saiasi júiemen qýǵyndalyp jatqanyn aityp, birneshe depýtat ony qoldap ashtyq jariialaǵan.
Eýroodaqtyń birqatar zań shyǵarýshylary Latviia jáne Ýkrainanyń burynǵy prezidentteri grýzin biligin Saakashvilidi bostandyqqa shyǵarýdy talap etti.
Saiasatkerdi bosatý úshin grýzin prezidenti oǵan raqymshylyq jasaýy tiis. Biraq prezident Salome Zýrabishvili ondaiǵa barmaitynyn aityp keledi.
