Qazaqstanda resmi tirkelgen 607 jaǵajai bar. Onyń tek 107-si ǵana kommýnaldyq menshikte, dep habarlaidy QazAqparat tilshisi.
QR IIM Tótenshe jaǵdailar komitetiniń tóraǵasy Vladimir Bekkerdiń aitýynsha, elimizde 50 myńnan astam sýǵa shomylyp, balyq aýlaityn aýmaq bar. Solardyń negizinde 607 resmi jaǵajai jasaqtalǵan.
«607 resmi jaǵajaidyń tek 107-si ǵana kommýnaldyq menshikte. Qalǵany - jeke menshiktiń ieliginde. Al tótenshe jaǵdai qyzmetiniń qutqarýshylary 607 jaǵajaidyń tek 27-sin ǵana baqylaidy. 113 stihiialy jaǵajaida 53 qutqarý posttary ornatyldy. Onyń árqaisysynda 2-3 qutqarýshy, bir qaiyq bar. Jyl basynan beri 880 qutqarý jasaqshylaryn tegin daiyndadyq. Solardan jeke menshiktegi jaǵajailar aýmaǵynda 335 qutqarý jasaǵy quryldy», - deidi komitet tóraǵasy.
Osyǵan qaramastan sýǵa ketkender sany byltyrǵydan asyp túsken. Vladimir Bekker shomylý maýsymy bastalǵaly beri 154 adamnyń ajaly sýdan bolǵanyn aitady.
«Shomylý maýsymy bastalǵan kúnnen beri 154 adam sýǵa ketti. Onyń 58-i bala. 2018 jyly bul kezeńde 148 adam sýǵa ketken bolatyn. Biyl sýǵa ketken 14 bala ata-aanasynyń qaraýynsyz qalǵan. Sonyń saldarynan olardyń ajaly aryq pen eleýsiz kólshikten kelgen. Meni bárinen buryn osy alańdatady», - dedi ol.
Aita ketsek, Vladimir Bekker arnaiy brifingte ótken senbi men jeksenbide 22 adamnyń sýǵan ketkenin aitqan bolatyn. Sondai-aq, elimizdiń tórt oblysynda orman órtiniń joǵary klasy týyndap tur.
