Jambyl oblysyna qarasty Qordai aýdanynda oryn alǵan oqiǵa qazaq qoǵamyn bei-jai qaldyrǵan joq. Qoǵam qairatkerleri de, elge tanymal mádeniet jáne óner ókilderi ashýǵa mingen halyqty aýyzbirshilikke, sabyrǵa shaqyryp, basý aityp jatyr. Osy rette QR Parlamenti Senatynyń depýtaty Nurtóre Júsip Qordai oqiǵasyna qatysty pikir bildirdi.
«Qordai janjaly janǵa maza taptyrar emes. Qaza tapqan qandastar otbasyna qaiǵyryp, kóńil aitamyn. Áleýmettik jelige kúnige júz ret kirip, ár habarǵa qaita-qaita qaraimyn.
Ashynǵandar bar. Arandaǵandar bar. Arandatýshylar da bar siiaqty... Kináli kim? Janjal neden bastaldy? Jaǵdai nege ýshyqty? Osynyń bárine kináli kim degen suraqtyń tóbesi qyltidy. Anadan kórý, mynadan kórý, jappai tártipsizdikke shaqyrý oryn alyp ta jatyr», - deidi senator.
Onyń pikirinshe, osyndaida basý aitylýy kerek.
«Biz eldik, memleketshildik qundylyqtardy birinshi kezekke shyǵara almai kelemiz. El bolǵan soń teli men tentek bolmai turmaidy. Tezge salatyn kim? Memleket! Daýlasýǵa bolady. Aitysaiyq. Tartysaiyq. Qyzyl keńirdek bolyp, óz pikirimizdi dáleldeýge tyrysaiyq. Tipti jaǵalasaiyq... Jaýlasýǵa bolmaidy! Jaǵalassaq ta jaǵa jyrtysýǵa, onyń artynan adam óltirýge bolmaidy. Aitysyp, tartysyp, kelip-kelip qai jerde toqtaýymyz kerek? Memleket degen jerde! Qazaq memleketi bolmasa – biz kimbiz? Kimge sózimiz júrgendei? Kimge basymyzdy kóterip, kimge týra qarai alǵandaimyz? Eńsemizdi osy el – óz memleketimiz úshin kóterip júrgen joqpyz ba?» - dep atap ótti Nurtóre Júsip.
«Qazaqstan Prezidenti Qasym-Jomart Toqaev – memleket basshysy retinde janjaldy retteýge, jaǵdaidy baqylaýǵa alýǵa óte sergek qarady. Tez reaktsiia jasady. Áýeli Twitter-de pikirin bildirdi. Sosyn málimdeme jasady. Úkimet quramynan arnaiy komissiia qurdy.
El eleńdep otyr. Namysyn taptatqysy kelmeidi. Túsinemiz.
Kinálilerdi anyqtaý, qylmys jasaǵandardy jazalaý, jaǵdaidy turaqtandyrý sol komissiia quzyrynda bolar. Birjaqty bolýdan saq bolsaq eken», - deidi senator.
Onyń aitýynsha, ádilettilik bolmaǵan jerde áleýmettik qaishylyqtar týyndai beredi.
«Túsinistik bolý úshin ne isteimiz? Qandai amal qylamyz?
Memleket degen uǵymdy basty basymdyqqa ainaldyrý úshin ne jasaimyz?
Qazir kez kelgenimiz ózimizge «Qazaqstan maǵan qymbat pa?» degen suraq qoiyp kórsek. Qymbat deitinimiz daýsyz.
Qymbat bir zatyńyzdy joǵaltyp alsańyz ne bolady? Jan-jaǵyńyzǵa alaqtaisyz. Sipalana beresiz. Qaita-qaita qaraǵyshtaisyz. Áiteýir janyńyz baiyz tappaidy. Qazir bárimizdiń basymyzda sondai jaǵdai turǵan siiaqty.
Bárimiz úshin eń qymbat qundylyq – Qazaq Elin, qazaq memlekettiligin joǵaltyp almaýdy oilasaq. Osy qaperde tursa! Ainalamyzdaǵy mysyqtileý memleketterdiń oiynshyǵyna ainalyp ketpeýdiń amalyn jasasaq.
Bir mezet bárimiz toqtasaq. Oilansaq. Ary qarai qalai bolady?
Qiraǵan dúnie-múlik qalpyna keler. Alań kóńil basylar. Tynyshtyq ornar.
Tógilgen qannyń óteýi qaitse tabylady? Tynyshtyqtyń keregi joq pa bizge? Dúrdaraz qaýym qaita jarasa ma? Álde yryń-jyryń jalǵasa bere me?
Bereke men birlik – Memlekettiń memlekettik tilinde! Bir tilde sóileitin, bir tilde túsinisetin qoǵamdy ornyqtyra almasaq, Abai aitqan «bas-basyna bi bolǵan óńkei qiqym» deńgeiinen asa almaimyz.
Qazaq – tózimdi, shydamdy ult. Talai qiyndyqqa shydadyq.
Namystan jaralǵan halyqpyz.
Endigi tańda eldik namys jolynda bolaiyq! «Jalqaý qazaq, beiqam qazaq, epsiz qazaq» degen sóz keltirmeiik!
«Jaýyz qazaq» degen jaman atqa qalmaiyq!
Birinshi kezekte ár qazaqtyń balasy óz otbasyn durystaýǵa umtylsa deimin: ulyń betimen ketpesin, qyzyń shekten shyqpasyn, úlkenniń sózi aiaq astynda qalmasyn; mynaý jalpaq eldi toltyratyn urpaq jalǵassyn, solardyń deni saý, bilimdi, imandy bolyp ósýin qadaǵalasyn; ár áýlet tirshilik kózin – kásibin, násibin tek eńbekten tapsyn; atqa mingen azamattardy aiaqtan shalýdan, aitaqqa erýden, qyzylkóz qyzǵanyshtan, dabyra men dańǵazadan, ysyrap pen qanaǵatsyzdyqtan saq bolsaq!
Bir-birimizge tek «bolsyn» deiikshi!
Qap-qorjynymyzǵa bereke tolsyn deiikshi!
Bir kezde «Qazaq qazaqqa bolyspasa, sol qaiǵy» degen maqala jazyp edim. Mynadai sabyrdyń sýy sarqylyp, abyr-dabyrdyń ahýaly ornyǵyp turǵan shaqta sol sózimdi taǵy da qaitalaǵym keledi.
Ózimizdi eldiń qory dep sezinbeiik.
Ózimizdi eldiń zory dep te sezinbeiik.
Qazaq bolaiyq!» - dep atap ótti ol.
