Shymkent qalasynyń mańynan óndiris oryndaryn kóptep ashý qajet. Bul óz kezeginde halyqty jumyspen qamtyp, shahardaǵy sabylysty azaitýǵa sep bolady. Sondai-aq qalada kópqabatty turǵyn úilerdiń qurylysyn júrgizip, gazben qamtamasyz etý máselesine mán berilýi tiis. Búgin bul týraly Shymkenttegi birneshe áleýmettik nysandaǵy qurylys jumystarynyń barysymen tanysqan Ońtústik Qazaqstan oblysynyń ákimi Janseiit Túimebaev málim etti.
Aimaq basshysy eń aldymen Bozaryq shaǵyn aýdanyndaǵy 900 oryndyq mektepke atbasyn burdy. Mundaǵy qurylys jumystary mamyr aiynda bastalǵan bolatyn. Jobanyń jalpy quny 1 mlrd 200 mln teńgeni quraidy. Nysannyń bas merdigeri «Tur-Ahmet i kompaniia» JShS-gi qurylys – montajdaý jumystaryna joǵary qarqynmen kirisip, mektepti 2018 jyldyń sáýir aiynda el igiligine beremiz dep otyr. Alaida oqý, sport jáne ashana bloktarynyń jumystary óndiristik kesteden 20-30 kúnge keshigip júrgizilýde. Oblys ákimi qurylys jumystaryn kestege sai júrgizýdi qatań tapsyrdy.
Munan soń óńir basshysy Bekjan bazary mańyndaǵy jol airyǵynyń qurylysyna aialdady. Bas merdiger – «JBI-S» kompaniiasy nysandy 2018 jyly paidalanýǵa bermek. Jol airyqtyń jalpy quny 1 mlrd 737 mln teńgeni quraidy.
Ákim nazarynan Temirlan tas joly – Mangeldin kósheleri qiylysyndaǵy jer ústi ótkeli men Qojanov kóshesindegi qurylys jumystary da tys qalǵan joq. Mundaǵy jóndeý jumystary 2015 jyldyń 1 tamyz kúni bastalǵan. Janseiit Qanseiituly ótkeldiń qurylysyna qajetti 51 mln teńgeni tezdetip bólip, jyl sońyna deiin aiaqtaýdy tapsyrdy. Aita keteiik, mundaǵy qurylys montajdaý jumystarynyń jalpy quny 219 mln teńgeni quraidy. Merdiger mekeme – «NýrKaz Konstrakshn» JShS.
Oblys ákimi kútpegen jerden Báidibek bi jáne Qonaev kóshesiniń qiylysynda ornalasqan «Qazbek» ámbebap bazaryna soqty. Saýdagerlermen tildesken ákim bazardy jyl sońyna deiin Bozaryq shaǵyn aýdany mańynda salynyp jatqan jańa bazarǵa kóshirýdi tapsyrdy.
Qala aralaý barysynda oblys ákimi Baitursynov kóshesindegi jylý magistraldy qubyrlaryn almastyrý barysyn da kórip shyqty. Memlekettik "Nurly jol" baǵdarlamasy aiasynda Baitursynov-Saparbaev-Rysqulov kóshelerindegi magistraldy jylý qubyry aýystyrylýda. Bul maqsatta 888,4 million teńge bólingen. Merdiger - "Siti-stroi" JShS. Jóndeletin ýchaskeniń jalpy uzyndyǵy - 5,2 shaqyrym. Qazirgi tańda jumys 4 shaqyrymnan astam jerde júrgizilgen. Ábden tozyǵy jetip, shirigen qubyrlar qaptalǵan jańa qubyrǵa aýystyrylýda. Olar tat baspaidy jáne jaryq pen tesik paida bolǵan jaǵdaida habar beretin quralmen jabdyqtalǵan.
«Oblys ortalyǵyndaǵy negizgi máselelerdiń biri baspana. Sondyqtan qala ortalyǵynda kópqabatty turǵyn úilerdiń qurylysyn kóptep júrgizýimiz qajet. Ekinshi másele – gazben qamtamasyz etý. Qazirgi tańda qalanyń 70 paiyzyn jeke ári jer úiler ornalasqandyqtan olardyń infraqurylymdyq qajettiliktermen qamtamasyz etý asa kóp shyǵyndy talap etip otyr»,- dedi Janseiit Qanseiituly.
Oblys basshysy ákimshilik iskerlik ortalyǵyndaǵy kommýnaldyq arendalyq turǵyn úiler men 1200 mekteptiń qurylysymen de tanysyp shyǵyp, atqarylǵan sharýalarǵa oń baǵasyn berdi.
Munan soń oblys basshysy Astana dańǵylynyń qurylysy júrip jatqan aýmaqqa keldi. Mundaǵy qurylystyń birinshi tarmaǵy biyl aiaqtalady. Iaǵni, Astana dańǵyly Arǵynbekov kóshesine qosylýy tiis. Al kelesi jyly qurylystyń ekinshi kezeńi júzege asyrylady: Ol kezde Astana dańǵyly Ótegenov kóshesine deiin sozylady.
