© Photo: Julita
Áleýmettik jeliler men messendjerlerde zeinetkerler jeke tulǵalardyń múlik salyǵynan tolyǵymen bosatylatyndyǵy týraly aqparat taralyp jatyr. Degenmen bul aqparat shyndyqqa janaspaidy, dep habarlaidy "Ult aqparat" QR Qarjy ministrliginiń Memlekettik kirister komitetine silteme jasap.
"Qazaqstan Respýblikasynyń Salyq kodeksine sáikes bólek turatyn zeinetkerler zańdy mekenjaiy (olardyń turǵylyqty mekenjaiy) boiynsha tek qana zeinetkerler tirkelgen barlyq salyq salý obektisiniń jalpy qunynan ailyq eseptik kórsetkishtiń 1000 eselengen mólsheri sheginde bosatylady. Esepteý barysynda respýblikalyq biýdjet týraly zańda belgilengen jáne tiisti qarjy jylynyń 1 qańtaryna qoldanysta bolatyn ailyq eseptik kórsetkish mólsheri qoldanylady" - delingen habarlamada.
Sonymen qatar kelesi tulǵalar da jeke tulǵalardyń múlik salyǵynan bosatylady:
1) ailyq eseptik kórsetkishtiń 1000 eselengen mólsheri sheginde – Keńes Odaǵynyń batyrlary, Sotsialistik Eńbek erleri, "Halyq qaharmany", "Qazaqstannyń Eńbek Eri" ataqtaryna ie bolǵan, úsh dárejeli Dańq ordenimen jáne "Otan" ordenimen nagradtalǵan adamdar, «Batyr ana» ataǵymen jáne «Altyn alqa» alqasymen nagradtalǵan kóp balaly analar;
2) ailyq eseptik kórsetkishtiń 1500 eselengen mólsheri sheginde – Uly Otan soǵysynyń ardagerleri, jeńildikter boiynsha Uly Otan soǵysynyń ardagerlerine teńestirilgen ardagerler jáne basqa memleketterdiń aýmaǵyndaǵy urys qimyldarynyń ardagerleri, Uly Otan soǵysy jyldarynda tyldaǵy qajyrly eńbegi men minsiz áskeri qyzmeti úshin burynǵy KSR Odaǵynyń ordenderimen jáne medaldarymen nagradtalǵan adamdar, sondai-aq 1941 jylǵy 22 maýsym – 1945 jylǵy 9 mamyr aralyǵynda keminde alty ai jumys istegen (qyzmet ótkergen) jáne Uly Otan soǵysy jyldarynda tyldaǵy qajyrly eńbegi men minsiz áskeri qyzmeti úshin burynǵy KSR Odaǵynyń ordenderimen jáne medaldarymen nagradtalmaǵan adamdar, múgedektigi bar adamdar, sondai-aq Salyq kodeksiniń 526-babynyń 2-tarmaǵynda belgilengen ózge de tulǵalar.
Memlekettik kirister komiteti 2022 jyl úshin múlik salyǵyn tóleý merzimi 2023 jyldyń 1 qazanynda aiaqtalatynyn eske salady.
