Zeinetaqynyń bir bóligin úleskerlik turǵyn úi qurylysy úshin qalai paidalanýǵa bolady? Salymshylar betpe-bet kelgen bul máseleniń mán-jaiyn «Otbasy bank» basshysy Lázzat Ibragimova túsindirdi, dep habarlaidy QazAqparat.
«Árine, úleskerlerdiń aqshasyna salynyp jatqan úi ádettegi úilerden arzan bolady. Bizdiń erejelerde ol úilerdi alýǵa múmkindik bar. Alaida bul rette bir talabymyz bar – salynyp jatqan nysanda Biryńǵai operator – Qazaqstan turǵyn úi kompaniiasynyń kepildigi bolýy kerek», - dedi Lázzat Ibragimova BaigeNews.kz portalynyń YouTube-arnasyndaǵy suhbatynda.
«Otbasy bank» bul shekteý nelikten engizilip otyrǵanyn túsindirip berdi.
«Jeke naryq 25 jyldyń ishinde qalai damyǵanyn kórdik. Eń kúrdelisi de osy úleskerlik qurylys jaǵdaiynda kezdesti. Úmiti úzilip, senimi joǵalǵan úleskerlerdi Qazaqstannyń qalalarynan áli de kezdestirýge bolady. Shýly stsenariiler qaitalanbas úshin memleket kepildik bergen nysandardan ǵana úi alýǵa múmkindik jasap otyrmyz. Ózińiz oilap qarańyz: siz úlesker retinde aldyn ala aqsha salyp, úi satyp alsańyz, tek qujatyn ǵana alatynyńyzdy eskerińiz. Al ol úiińizdiń tipti qabyrǵasy da turǵyzylmaýy múmkin. Al men aityp otyrǵan jaǵdaida nysan qurylysynyń aiaqtalýyna memleket kepildik beredi», - dedi ol.
