QR Prezidentiniń baspasóz hatshysy Berik Ýáli zeinetaqynyń bir bóligin qoldanýǵa qatysty Memleket basshysynyń Joldaýdaǵy tapsyrmasy qalai oryndalyp jatqany týraly málimet usyndy, dep habarlaidy "Ult aqparat".
QR Prezidenti Qasym-Jomart Toqaev 2020 jyldyń 1 qyrkúieginde jariialaǵan Joldaýynda: «Biryńǵai jinaqtaýshy zeinetaqy qorynyń 700 myń salymshysy 2021 jyly óz jinaqtarynyń bir bóligin turǵyn úi satyp alýǵa, emdelýge nemese qarjy kompaniialarynyń basqarýyna berýge paidalana alady. Úkimetke Ulttyq bankpen birlesip, aǵymdaǵy jyldyń sońyna deiin barlyq qajetti normativtik-quqyqtyq aktilerdi qabyldaýdy jáne daiyndyq jumystaryn júrgizýdi tapsyramyn», - degen bolatyn.
Osy tapsyrmaǵa sáikes, búginde 761 myńnan astam salymshy óz jinaqtarynyń jetkiliktilik sheginen asatyn bir bóligin apaidalanýǵa múmkindik aldy. BJZQ salymshylardyń arnaiy shottaryna 1,2 trln teńgeden astam qarajat aýdardy.
Onyń ishinde:
- turǵyn úi jaǵdaiyn jaqsartýǵa – shamamen 1,187 trln teńge;
- emdelýge – 4,6 mlrd teńgeden astam;
- zeinetaqy jinaqtaryn investitsiialyq portfeldi basqarýshyǵa aýdarý týraly 1230 ótinish oryndalyp, shamamen 2,8 mlrd teńge kompaniialarǵa aýdaryldy.
Eske salaiyq, Qazaqstan azamattaryna Biryńǵai jinaqtaýshy zeinetaqy qoryndaǵy jinaqtarynyń bir bóligin paidalaný quqyǵy biylǵy jyl basynan bastap berildi.
QR Prezidenti zeinetaqy jinaǵynyń bir bóligin maqsatty paidalanýǵa qatysty zańǵa 2 qańtarda qol qoidy.
