QR Densaýlyq saqtaý ministrligi Biryńǵai jinaqtaýshy zeinetaqy qoryndaǵy emdelýge beriletin birjolǵy tólemderdi paidalaný týraly buiryqty tirkedi, dep habarlaidy "Ult aqparat".
«Ádilet ministrligi zeinetaqy qoryndaǵy emdelýge beriletin birjolǵy tólemderdi paidalaný týraly buiryqty tirkedi», - delingen ministrlik aqparatynda.
Buiryq 2021 jylǵy 15 aqpanda merziminen buryn bekitilip, Qazaqstan Respýblikasynyń Ádilet ministrliginde 2021 jylǵy 17 aqpanda tirkelgen.
Osy buiryq alǵashqy resmi jariialanǵan kúninen bastap qoldanysqa engiziledi jáne jaqyn arada jariialanatyn bolady.
Birjolǵy zeinetaqy tólemderin emdelýge paidalaný Qazaqstan Respýblikasynyń azamattaryna kepildendirilgen tegin meditsinalyq kómek jáne (nemese) mindetti áleýmettik meditsinalyq saqtandyrý aiasynda qarastyrylmaǵan meditsinalyq qyzmetterdi qosymsha alýǵa múmkindik beredi.
Birjolǵy zeinetaqy tólemderi esebinen tólenetin meditsinalyq qyzmetter tizbesine kelesiler engizildi:
- dárilik qamtamasyz etýdi qosa alǵanda, orfandyq syrqattardy emdeý. Sondai-aq emdeý taktikasyn anyqtaý úshin diagnostikalyq zertteý;
- Qazaqstan Repsýblikasynyń aýmaǵynda ornalasqan meditsina mekemeleri kórsetetin stomatologiialyq qyzmetter (tisti protezdeý, implantatsiia);
- operatsiiadan keiingi tyrtyqtar men týa bitken aqaýlardy, sondai-aq mastektomiiadan keiin túzetý maqsatynda rekonstrýktivti jáne qalpyna keltirý operatsiialary (plastikalyq)
- radionýklidtik jáne radioiodterapiia
- radiohirýrgiialyq emdeý
- proton terapiiasy
- oftalmologiialyq qyzmetter.
Meditsinalyq qyzmetterdiń osy tizbesi halyqtyń qajettiligin eskere otyryp qaita qaralýy múmkin.
Emdelýge beriletin birjolǵy zeinetaqy tólemderin paidalaný úshin ótinish berýshi BJZQ-dan birjolǵy zeinetaqy tóleminiń qoljetimdi somasy týraly aqparatty, onyń ishinde BJZQ-nyń internet-resýrsy arqyly óz betinshe alýy qajet. Sodan keiin joǵaryda kórsetilgen tizbege sáikes jeke basyn kýálandyratyn qujattyń kóshirmesin jáne beiindi mamannyń qorytyndysyn qosa bere otyryp, birjolǵy zeinetaqy tólemderi esebinen emdelýge jiberý týraly qorytyndyny alý úshin tirkelgen jeri boiynsha emhananyń dárigerlik-konsýltatsiialyq komissiiasyna júginedi.
Dárigerlik-konsýltativtik komissiia sheshimdi azamat ótinish bergen kúnnen bastap bes jumys kúninen keshiktirmei qabyldaidy. Qorytyndyny alǵannan keiin ótinish berýshi sheteldik uiymdy (stomatologiialyq qyzmetterdi qospaǵanda) qosa alǵanda, meditsinalyq uiymdy tańdaýy tiis, onymen sharttyń skanerlengen nusqasyn ári qarai tirkei otyryp jáne ýákiletti operatordyń internet-resýrsyndaǵy (Otbasy bank) óziniń jeke kabinetinde dárigerlik komissiia jasasýmen meditsinalyq qyzmetter kórsetý týraly shart jasasady.
Ýákiletti operator (Otbasy bank) alýshy usynǵan qujattar birjolǵy zeinetaqy tólemderiniń nysanaly maqsatyna sáikes kelgen kezde alýshydan qujattardy alǵan kúnnen bastap bes jumys kúni ishinde birjolǵy zeinetaqy tólemderin olardyń nysanaly maqsaty boiynsha aýdarady.
