Jekelegen qazaqstandyqtar zeinetaqynyń bir bóligin paidalaný arqyly turǵyn úi ipotekasynyń negizsi qaryzyn jabý kezinde bankke aiypaqyny tóleýge mindettelgen. Bul máseleniń anyq-qanyǵyn «Otbasy bank» basshysy Lázzat Ibragimova aityp berdi, dep habarlaidy QazAqparat.
«2016 jyly merziminen buryn bereshekti óteýge qatysty zańǵa ózgerister men tolyqtyrýlar engizildi. Bankke qaryz berý – nesie arqyly tabys tabýǵa bolatyn múmkindik. Máselen, eger men kommertsiialyq banktiń basshysy bolsam, depoziti bar azamattarǵa jylyna 10 paiyz tóleimin de, nesieni 14 paiyzben beremin. Iaǵni 4 paiyz – ipoteka boiynsha ekinshi deńgeili banktiń marjasy. Qazaqstanda bankterdiń tabysy ortasha eseppen osyndai», - dedi Lázzat Ibragimova BaigeNews.kz portalynyń YouTube-arnasyndaǵy suhbatynda.
Onyń aitýynsha, eger kredit alýshy nesieni merziminen buryn japqysy kelse, bankke bul jaǵdai asa tiimdi emes. Sebebi ol uzaq merzimdi tabysynan aiyrylady.
«Nege deseńiz, óziniń damý baǵdarlamasynda, biýdjetinde bank ylǵi da paiyzdyq tabysyn eseptep qoiady. Sondyqtan negizgi qaryzdy merziminen buryn tólegen jaǵdaida aiypaqyny qosyp qoiǵan. Biraq zańnama muny qazir qatań qadaǵalaidy. Eger siz kelisimshart negizinde ipotekalyq nesie alsańyz, onda aiyppul, iaǵni aiypaqy qaryz alǵan merzimnen bastap 6 ai ǵana kúshinde bolady. Ary ketkende 12 ai. Osy merzimnen keiin siz eshqandai aiypaqysyz nemese aiyppulsyz negizgi qaryzdy jaba alasyz», - dedi ol.
