Ulttyq bank tóraǵasy Erbolat Dosaev Úkimet otyrysynda dizel otynynyń qymbattaýy men teńge baǵamynyń álsireýne qatysty pikir bildirdi, dep habarlaidy QazAqparat.
«Qyrkúiekte dizel otynyna baǵanyń ósýi 3,8%-ti qurady, al jekelegen oblystarda 10%-ten asty. Óndiristiń ósýine, sondai-aq eksporttyń toqtatylýyna qaramastan, infliatsiialyq qysymdy kúsheitetin jáne basqa taýarlarǵa janama áser etetin dizel otynynyń tapshylyǵy baiqalady», - dedi ol.
Ulttyq bank tóraǵasy qyrkúiekte jyldyq infliatsiia eldegi 13 óńirde jyldam óskenin eske saldy.
«Munai baǵasynyń aitarlyqtai ósýine qaramastan, ishki naryqtaǵy suranys teńgeniń aiyrbastaý baǵamyna qysym kórsetýde. 2021 jylǵy 9 aida birjada ekinshi deńgeidegi bankterdiń satyp alýy 19%-ke ulǵaidy jáne 2021 jylǵy 7 aida tutyný taýarlary importynyń 25%-ke ulǵaiýy aiasynda ortasha alǵanda aiyna 2,6 mlrd AQSh dollaryna jetti. Fiskaldyq yntalandyrý, zeinetaqy jinaqtaryn paidalaný da importtyń ulǵaiýy men shetel valiýtasyna degen suranystyń ósý faktory bolyp tabylady», - dedi Erbolat Dosaev.
