sýret: Tengrinews.kz
Zeinetaqy jinaǵynyń shekti mólsherinen asatyn aqshaǵa jer telimin satyp alýǵa bolady. Bul týraly "Otbasy bank" AQ basqarma tóraǵasy Lázzat Ibragimova málimdedi, dep habarlaidy Sputnik Qazaqstan.
"Biz búgin osy optsiiany iske qostyq. Endi zeinetaqy jinaǵynyń bir bóligine jer telimin satyp alýǵa bolady. Portalda arnaiy batyrma engizildi", - dedi Ibragimova ortalyq kommýnikatsiialar qyzmetinde ótken onlain brifingte.
Onyń aitýynsha, buǵan deiin zeinetaqy jinaǵynyń qarjysyna jekemenshik úi salýǵa ruqsat berilgen. Alaida salymshylardyń kóbisi úi salý úshin aldymen jer telimin satyp alý qajettigin aitqan.
"Mine, zeinetaqy jinaǵyn merziminen buryn paidalaný aiasynda jer telimin satyp alý múmkindigi berilip otyr. Jerdi eki maqsatta ǵana alýǵa bolady. Jeke turǵyn úi qurylysyna nemese jeke qosalqy sharýashylyqqa. Eki jyldyń ishinde úi salyp, bankke tiisti qujattardy jiberý kerek", - dep túsindirdi Ibragimova.
Barlyq qujat enpf-otbasy.kz portalyndaǵy jeke kabinet arqyly jiberiledi.
"Eki-aq qujatty jiberý kerek. Bireýi – úidi paidalanýǵa berý aktisi, ekinshisi – jyljymaityn múlikke tirkelgen quqyq pen onyń tehnikalyq sipattamasy týraly anyqtama", - deidi Ibragimova.
Al eki jyldyń ishinde úi salynbasa, aqshany qaitarýǵa týra keledi. Alaida qujat rásimdeý jaǵynan qiyndyqtar týyndaǵan jaǵdaida qosymsha ýaqyt berilýi múmkin.
