26 qańtarda Biryńǵai jinaqtaýshy zeinetaqy qoryna Otbasy bankinen jalpy somasy shamamen 314,3 mlrd teńgege 17 092 ótinim kelip tústi. Kelip túsken barlyq ótinim sol kúni qaraldy, dep habarlaidy qordyń baspasóz qyzmeti.
«Olardyń ishinen 11 798 ótinim (69% nemese jalpy somasy 63 mlrd teńgeden astam) tekserýden sátti ótti. Nátijesinde BJZQ-ǵa ótinimder kelip túsken kúnnen bastap 5 jumys kúninen keshiktirilmei salymshylardyń «Otbasy bankindegi arnaiy shotyna 63 mlrd teńgeden astam qarajat aýdarylady. Aýdarymnyń ortasha somasy 5,4 mln teńge. 5 294 ótinim (31%) zańnama talaptaryna sáikes kelmeitindikten qabyldanbady», delingen habarlamada.
BJZQ-ǵa «Otbasy bankinen» jiberilgen ótinimderdiń qabyldanbaýynyń negizgi sebepteri burynǵysynsha alýǵa bolatyn soma qate kórsetilýi, jeke tabys salyǵyn tóleý tásilin tańdaý kezinde alýǵa bolatyn somany durys kórsetpeý, investitsiialyq tabystyń naryqtyq aýytqýyna bailanysty alýǵa bolatyn somanyń ózgerýi, qaitalap berilgen ótinimder boldy. Birneshe adamnyń ótinimi BJZQ-da jeke zeinetaqy shoty jáne zeinetaqy jinaǵy joq bolǵandyqtan qaitaryldy.
Kelip túsken ótinimderdi qaraýdyń alǵashqy eki jumys kúniniń qorytyndysy boiynsha, iaǵni, BJZQ-ǵa ýákiletti operatordan 25 jáne 26 qańtarda túsken barlyq ótinimder sol kúnderi kidirissiz qaraldy. Bul rette jalpy somasy 112 mlrd teńgege jýyq 20 252 ótinim tekserýden sátti ótip, jumysqa qabyldandy. Ótinimniń ortasha somasy shamamen 5,6 mln teńgeni quraidy.
«Azamattarǵa óziniń zeinetaqy jinaǵy týraly ózekti aqparatty, onyń ishinde qoljetimdi soma týraly málimetterdi enpf.kz saityndaǵy jeke kabinetten nemese mobildi qosymsha arqyly birjolǵy zeinetaqy tólemin alýǵa tikelei ótinim berer aldynda muqiiat tekserýge keńes beremiz. Alýǵa qoljetimdi somalar salymshyǵa yńǵaily jáne óz betinshe tańdaý jasaý úshin BJZQ beretin úzindi kóshirmede kórsetilgen», delingen habarlamada.
Salymshynyń BJZQ-da jetkiliktilik sheginen asatyn somasy bolǵan jaǵdaida, ony paidalanýǵa ótinim sheksiz ret berilýi múmkin. Eger qandai da bir sebeppen salymshyǵa birjolǵy zeinetaqy tólemin alýǵa arnalǵan ótinimdi qanaǵattandyrýdan bas tartylsa, onda bas tartý sebebin joiyp, ýákiletti operatorǵa qaitadan ótinim berýge bolady. Eger salymshy jinaǵyn ártúrli maqsatqa paidalanǵysy kelse, onda alýǵa bolatyn soma sheginde osy maqsattarǵa jeke ótinim berýine bolady.
Ótinim berýge jáne zeinetaqy jinaqtaryn turǵyn úi jaǵdaiyn jaqsartý jáne (nemese) emdelýge aqy tóleý úshin nysanaly paidalaný sharttaryna bailanysty barlyq máseleni ýákiletti operator «bir tereze» qaǵidaty boiynsha qaraidy jáne BJZQ-ǵa jeke ótinish berý talap etilmeidi.
