Qazaqstandyqtar zeinetaqy jinaǵy qoryndaǵy tólemniń belgili bir bóligin baspana alýǵa jáne emdelýge jumsai alady. Búginde zeinetaqy tólemin jumsaý salasyndaǵy reformanyń igiligin kórgen 147 myńnan astam otandasymyz baspanaly bolyp otyr. Bul týraly «Otbasy bank» AQ-nyń baspasóz hatshysy Janar Joltaeva málim etti, dep habarlaidy "Ult aqparat".
«Búgingi kúni 147 myń qazaqstandyq úi iesi atandy, taǵy 72 myńnan astamy ipotekalyq qaryzyn ótedi jáne 18 myńǵa jýyq adam zeinetaqy qoryndaǵy qarajatynyń bir bóligin emdelýge jumsady. Olardyń úshten biri – áielder (75 493) jáne úshten ekisi – er azamattar (161 879). Birjolǵy zeinetaqy tólemderin qoldaný boiynsha birinshi orynda Mańǵystaý oblysynyń turǵyndary tur (36 853 adam), olar jalpy somasy 326 mlrd teńge paidalanǵan. Ekinshi orynda Nur-Sultan qalasy (36 339 adam), elorda turǵyndary 217 mlrd-qa jýyq teńge qoldanǵan. Almaty qalasy – úshinshi orynda (31 438 adam), almatylyqtar jalpy somasy 241 mlrd-qa jýyq teńgeni turǵyn úi jaǵdaiyn jaqsartý jáne emdelý aqysyn tóleýge jumsaǵan. Iaǵni birjolǵy zeinetaqy tólemin enpf-otbasy.kz platformasy arqyly turǵyn úi jaǵdaiyn jaqsartýǵa jáne emdeý úshin jumsaýǵa bolady», - dedi Janar Joltaeva.
Onyń aitýynsha, zeinetaqy qoryndaǵy jinaǵyn Mańǵystaý oblysynyń 40 pen 59 jas aralyǵyndaǵy er azamattar jii paidalanǵan. Áielder arasynda Nur-Sultan qalasynyń 40 pen 59 jas aralyǵyndaǵy qyz-kelinshekteri kósh bastap tur.
«Biyl qańtar aiynan qazaqstandyqtarǵa turǵyn úi jaǵdaiyn jaqsartý jáne emdelý aqysyn tóleý boiynsha biryńǵai jinaqtaýshy zeinetaqy qorynan birjolǵy zeinetaqy tólemderin paidalaný múmkindigi berildi. Ol úshin arnaiy onlain platformasy iske qosyldy. Sonymen qatar ol jerde jeke shot ashý múmkindigi de qarastyrylǵan. Osy ýaqyta aralyǵynda 237 372 adam atalǵan onlain qyzmet arqyly 1 trln 344 mlrd teńgeni quraityn zeinetaqy qoryndaǵy tólemin paidalandy», - deidi ol.
Sondai-aq, bank ókili zeinetaqy jinaǵyndaǵy tólemge úige jóndeý jumystaryn jasaýǵa da bolatynyn aitty.
«Odan bólek, 11 myńnan astam adam birjolǵy zeinetaqy tólemin ekinshi sanattaǵy úilerdi satyp alýǵa jumsaǵan jáne 2 myńnan astam adam birinshi sanattaǵy turǵyn úilerdi satyp alǵan, iaǵni jańa úiler. Sol siiaqty 100-den astam turǵyn zeinetaqy qoryn qurylysqa, qaita jáne kúrdeli jóndeý jumystaryna jumsap otyr», - dedi J. Joltaeva.
