Eńbek jáne halyqty áleýmettik qorǵaý ministrligi jumys berýshilerdiń 5 paiyzdyq mindetti zeinetaqy jarnalaryn engizý merzimi ózgertiletinin joqqa shyǵardy, dep habarlaidy "Ult aqparat".
«Zeinetaqy zańnamasyna jańa túzetýler ázirleý týraly BAQ-ta taratylyp jatqan aqparat shyndyqqa sáikes kelmeidi», - dep jazylǵan ministrliktiń baspasóz qyzmeti taratqan málimette.
Vedomstvo taratqan resmi aqparatqa súiensek, BAQ-ta saraptamalyq pikir negizinde Eńbek jáne halyqty áleýmettik qorǵaý ministrligi jumys berýshilerdiń 5% mólsherindegi mindetti zeinetaqy jarnalaryn engizý týraly zańnamalyq túzetýler ázirlegeni týraly aqparat taraǵan.
«2018 jylǵy 1 qańtardan bastap jumys berýshilerdiń mindetti zeinetaqy jarnalaryn engizýdi júzege asyrý josparlanǵan bolatyn. Memleket basshysynyń tapsyrmasy boiynsha 2019 jyly zańnamalyq túzetýler qabyldandy. Ol boiynsha jumys berýshilerdiń mindetti zeinetaqy jarnalaryn engizý merzimderi 2023 jylǵa aýystyryldy. Sondai-aq, 2019 jyly Memleket basshysynyń tapsyrmasy boiynsha QR Úkimeti janynan zeinetaqy júiesin odan ári damytý, onyń ishinde JMZJ engizý máselelerin qaraý jónindegi jumys toby quryldy», -dep jazady ministrliktiń baspasóz qyzmeti.
Atalǵan jumys toby ázirlegen usynystardy Memleket basshysy qoldaǵan bolatyn.
«Usynylǵan sharalardyń bir bóligi zańnamalyq deńgeide de, praktikalyq turǵyda da iske asyryldy. Mysaly, 2021 jyldan bastap azamattarǵa zeinetaqy jinaqtarynyń bir bóligin turǵyn úi jaǵdailaryn jaqsartýǵa, emdelýdiń aqysyn tóleýge, qarjy uiymdarynyń basqarýyna berýge maqsatty paidalaný múmkindigi berildi. Qoldanystaǵy zańnama boiynsha jumys berýshiler 2023 jyldan bastap óz qarajaty esebinen jumyskerleriniń paidasyna JMZJ aýdaratyn bolady. Bul rette jumys berýshige júkteme, onyń ishinde MZJ tólengen somany salyq salynǵanǵa deiingi shegerimge jatqyzý bóliginde Salyq kodeksiniń sheńberinde kózdelgen jeńildikterdiń esebinen qolaily deńgeide qalady», - dep jazylǵan resmi aqparatta.
