Eńbek jáne halyqty áleýmettik qorǵaý ministrligi zeinetaqy men memlekettik járdemaqylarǵa jyldyq turǵyda 10%-ǵa indeksatsiialaýdy júrgizdi, dep habarlaidy "Ult aqparat" ministrliktiń baspasóz qyzmetine silteme jasap.
1 sáýirden bastap Eńbek jáne halyqty áleýmettik qorǵaý ministrligi, Memleket basshysynyń biylǵy 31 naýryzdaǵy tapsyrmasyna sáikes, zeinetaqylar men memlekettik járdemaqylardy jyldyq turǵyda 10%-ǵa indeksatsiialaýdy júrgizdi. Osylaisha 2020 jyldyń 1 sáýirinen bastap zeinetaqynyń eń tómengi mólsheri 40 441 teńgeni quraityn boldy.
Nátijesinde, aǵymdaǵy jyly, zeinetaqy eki ret kóterildi.
«Máselen 2020 jyldyń 1 qańtarynan infliatsiianyń boljamdy deńgeii eskerile otyryp, bazalyq zeinetaqyǵa 5%, al jasyna jáne eńbek sińirgen jyldaryna bailanysty zeinetaqy tólemderine 7% (infliatsiia deńgeiinen 2%-ǵa artyq) kezekti ret jyl saiynǵy indeksatsiia jasaldy.
2020 jyldyń 1 sáýirinen jasyna jáne eńbek sińirgen jyldaryna bailanysty zeinetaqy tólemderi 2020 jylǵa deiin taǵaiyndalǵanymen qosa osy jylǵy 1 qańtar men 31 naýryzda bekitilgen bóligi 5%-ǵa joǵarylady», delingen habarlamada.
Ministrlik atalmysh ózgeristerge qatysty mysaldar keltirdi.
Birinshi mysal: er adamǵa 18.11.2019 jyldan beri 43 000 teńge yntymaqty zeinetaqy taǵaiyndaldy delik. Onyń zeinetaqysy jyl saiynǵy qaita esepteý aiasynda 2020 jyldyń 1 qańtarynan qańtarynan 46 010 teńgeni qurady. 2020 jylǵy 1 sáýirden bolsa, atalǵan yntymaqty zeinetaqy 5% ósip, 48 311 teńge bolady (46 010+5%=48 311).
Ekinshi mysal: áiel adamǵa 12.03.2020 jyldan 52 000 teńge taǵaiyndaldy dep alaiyq. 2020 jylǵy 1 sáýirden, 5% ósimdi eskersek, bul yntymaqty zeinetaqy 54 600 teńgeni mejeleidi (52 000+5%=54 600).
Memlekettik bazalyq zeinetaqy tólemine keler bolsaq, ol «Qazaqstan Respýblikasyndaǵy zeinetaqymen qamsyzdandyrý týraly» zańynyń 4-babyna sai, 2020 jyldyń 1 sáýirinen eń tómengi kúnkóris deńgeiiniń jańa somasy boiynsha paiyzdyq mólsherde aiqyndalady.
Mysal: er adamǵa 20.12.2019 jyldan beri 26 729 teńge nemese kúnkóris deńgeiinen 90% bazalyq zeinetaqy taǵaiyndaldy. 2020 jyldyń 1 qańtarynan onyń mólsheri, kúnkóris deńgeiiniń jyl saiynǵy ósimin nazarǵa alsaq, 28 065 teńgeni kórsetip, 2020 jyldyń 1 sáýirinen 29 402 teńgeni quraidy (biylǵy 1 sáýirden eń tómengi kúnkóris deńgeii 32 668 teńge bolyp bekitildi, onyń 90%-y=29 402).
Osy oraida, «2020-2022 jyldardaǵy respýblikalyq biýdjet týraly» zańyna engizilgen ózgertýlerge sáikes, 1 sáýirden bastap eń tómengi zeinetaqy mólsheri 40 411 teńge boldy.
Tiisti qadamdar 2,2 millionnan astam zeinetkerdi qamtidy.
