QR Indýstriia jáne infraqurylymdyq damý vitse-ministri Marat Qarabaev turǵyn úi baǵasynyń kúzge jyl sońyna deiin 30 paiyz qymbattaityny týraly boljamǵa qatysty pikir bildirdi, dep habarlaidy QazAqparat.
«Bizdiń baǵalaýymyz boiynsha, jyl basynda byltyrǵymen salystyrǵanda baspana baǵasy 13-15 paiyz ósti. Biraq oǵan úsh negizgi faktor áser etti. Birinshiden, pandemiia kezindegi toqtaýlardyń keiinge qalǵan suranysy qosyldy. Ekinshiden, pandemiiaǵa bailanysty logistikalyq problemalar boldy. Qurylys materialdarynyń shetelden tasymaly kesheýildedi. Úshinshiden, eń úlken faktor zeinetaqy qorynan bólingen qarjy boldy. Osy ýaqytqa deiin 1,5 trln teńgege turǵyn úi satyp alý múmkindigi boldy. Osy úsh faktor áserinen turǵyn úi baǵasy 13-15 paiyz kóterildi. Al qazir ondai faktorlar men boljamdar kútilip otyrǵan joq. Sondyqtan, 30 paiyzdyq qymbattaý boljamy negizsiz dep oilaimyn», - dedi vitse-ministr.
Onyń aitýynsha, aldaǵy 4 jyldyń ishinde turǵyn úi salýǵa qajetti materialdyń bári Qazaqstanda óndirilmek.
«Muny endi naqty óndiriletin qurylys materialdarymen bailanystyrsaq, ózimizde shyǵarylatyn materialdardyń baǵasy turaqty bolyp jatyr. Kei jerler jyl basyndaǵy, ortasyndaǵy baǵany tómendetti. Ishki naryqtyń 60 paiyzy otandyq qurylys materialdarymen qamtamasyz etilgen. Linoleým, túsqaǵazdar, kreamikalyq taqta, sanfaians siiaqty importtyq taýarlar bar. Aldaǵy 3-4 jylda ol taýarlar tolyq ózimizde óndiriledi», - degen Marat Qarabaev kremaika taqtasyn yshǵaratyn 2 zaýyt salynyp jatqanyn atady.
«Mysaly, keramika taqtalaryn shyǵaratyn bir ǵana zaýytymyz boldy. Osy ýaqytqa deiin Shymkenttegi zaýyt jylyna 2 mln sharshy metr shyǵaryp keldi. Kúni keshe Aqtóbe oblysynda 5 mln sharshy metr shyǵaratyn jańa zaýyt iske qosyldy. Nur-Sultan qalasynda 12 mln sharshy metr ónim shyǵaratyn zaýyt salynyp jatyr. Aqtóbe qalasynda taǵy bir 5 mln sharshy metr ónim shyǵaratyn zaýyt salý josparlanǵan. Olar tek ishki naryqty qamtamasyz etip qoimai, eksportqa da shyǵarady. Qazirdiń ózinde keramika taqtalary eksportqa shyǵarylyp jatyr», - dedi ministrdiń orynbasary.
