Biryńǵai jinaqtaýshy zeinetaqy qory salymshylarynyń jyl basynan bergi investitsiialyq tabysy 1,1 trln teńgeni qurady, dep habarlaidy "Ult aqparat" qordyń baspasóz qyzmetine silteme jasap.
«BJZQ» AQ zeinetaqy jinaqtarynyń somasy 12,6 trillion teńgeden asty. Oǵan zeinetaqy jarnalary men investitsiialyq tabystyń kiretini belgili.
«Táýekelderdi azaitý maqsatynda investitsiialyq portfel investitsiialaý túrleri, baǵyttary, onyń ishinde valiýtalar boiynsha ártaraptandyrylǵan. Qazirgi ýaqytta investitsiialardyń 2/3 jýyǵy teńgemen jáne 1/3 jýyǵy shetel valiýtasymen, onyń basym bóligi AQSh dollarymen nominaldanǵan. Salymshylardyń (alýshy) zeinetaqy jinaǵynyń somasy zeinetaqy aktivterin investitsiialaý nátijesine sáikes kún saiyn qaita esepteledi jáne qaita baǵalanady. Investitsiialyq tabystyń quramyna baǵaly qaǵazdar (salymdar jáne basqa da operatsiialar) boiynsha syiaqy, qarjy quralyn naryqta qaita baǵalaý, valiýtalyq qaita baǵalaý, syrtqy basqarýdaǵy aktivter boiynsha kirister kiredi», – dep habarlady qordan.
Jyldyń 10 aiynda 2020 jyldyń 1 qańtarynan bastap 31 qazanyna deiin salymshylardyń shottaryna 1,1 trln teńge mólsherinde taza investitsiialyq kiris esepteldi. Bul 2019 jyldyń sáikes kezeńindegi kórsetkishten eki ese artyq.
Aita keteiik, bir jyl ishindegi kiristilik 7,1% infliatsiia kezinde 10,88% boldy. Bul rette 2020 jyldyń basynan bastap kiris 9,94%, al infliatsiia 5,5% qurady.
