Jetisý oblysynyń Saryózek aýylynda eldi meken aýmaǵyna kirip ketken qonjyqty izdeý jumystary júrip jatyr, dep habarlaidy ult.kz.
Jabaiy janýar túsirilgen video áleýmettik jelilerde taraǵan. Kýágerlerdiń aitýynsha, qonjyq tańǵy saǵat 5 shamasynda baiqalǵan. Kólikten shoshyp ketken janýar aýyl kósheleriniń birine qarai qashyp ketken.
Aýyl ákimdigi qazirgi ýaqytta qonjyqty izdeý sharalary uiymdastyrylǵanyn málimdedi. Izdeý jumystaryna politsiia qyzmetkerleri, tótenshe jaǵdailar mamandary, ormanshylar men veterinariialyq stantsiia ókilderi jumyldyrylǵan.
Jergilikti turǵyndarǵa sabyr saqtap, janýar qaita baiqalǵan jaǵdaida birden tiisti organdarǵa habarlaý eskertildi. Sonymen qatar mamandar qonjyqqa ziian keltirmeýge shaqyrdy.
Ázirge jabaiy janýardyń aýylǵa qalai kelgeni belgisiz. Saryózekke eń jaqyn ornalasqan Altyn-Emel ulttyq parki ondaǵan shaqyrym qashyqtyqta ornalasqan.
Áleýmettik jeli qoldanýshylary qonjyqtyń paida bolýyna qatysty túrli boljam aityp jatyr. Keibiri onyń qoldan qashyp ketkenin jazsa, endi biri janýar aýrý bolýy múmkin degen pikir bildirýde. Alaida jergilikti bilik naqty qorytyndy jasaýǵa áli erte ekenin aitty.
