Ýkraina prezidenti Vladimir Zelenskii reseishil magnat Viktor Medvedchýk ústinen qozǵalǵan qylmystyq is jyldar boiy eldiń saiasi-ekonomikalyq keńistiginde basymdyqqa ie bolyp kelgen magnattar tobynyń yqpalyn shekteýdiń "basy ǵana" dep málimdedi.
Azattyq agenttiginiń jazýynsha, Vashingtonda shoǵyrlanǵan "Atlantik keńesi" taldaý ortalyǵynyń vebsaitynda 18 mamyrda jariialanǵan málimdemede Vladimir Zelenskii bul "sailanbaǵan elita ózderiniń biligi men bailyǵyn ýystan shyǵaryp almas úshin júieni ábden azyp-tozdyrdy" dep aitqan. Ol Ýkrainanyń oligarhtarmen kúreste birqatar nátijelerge qol jetkizgenin aityp, aqpan aiynda prezident ákimshiliginiń Medvedchýkke salǵan sanktsiiasyn meńzedi. Viktor Medvedchýktiń televidenie, munai jáne ózge salalarda aktivteri bar.
"Bul - kúrestiń basy ǵana. Eldegi barlyq oligarhtar azaiyp, iri kásipker deńgeiine túskenge deiin osy siiaqty sharalar jalǵasa beredi" degen Zelenskii málimdemede.
Onyń pikirinshe, "Medvedchýk isi" media aktivteri men saiasi yqpaldan arylǵan kezde osy siiaqty adamdardyń "azýsyz" qalatyndyǵyn kórsetedi. "Memleketke opasyzdyq jasady" dep aiyptalyp otyrǵan Medvedchýk isi boiynsha sot shilde aiynda bastalady. Medvedchýktiń ózi istiń saiasilanǵanyn aitady.
