Qazaqstandyq Zarina Diias Tsintsinnati (AQSh) WTA týrniriniń ekinshi ainalymyna shyqty, dep habarlaidy QazAqparat tilshisi.
Dúniejúzilik reitingte 80-orynda turǵan Z.Diias bastapqy kezdesýin «Úlken dýlyǵa» týrnirleriniń 23 márte jeńimpazy, ataqty amerikalyq Serena Ýiliamspen ótkizýi tiis bolatyn.
Alaida S.Ýiliams jeme-jemge kelgende, jaraqatyna bailanysty jarysqa qatysýdan bas tartty.
Uiymdastyrýshylarǵa aiaq astynan amerikalyq, álemniń 56-raketkasy Djessika Pýgelany shaqyrýyna týra keldi.
Ortalyq kortta ótken matchtyń birinshi partiiasyn qarqyndy bastaǵan Zarina 5:0 esebimen alǵa shyqty.
Osydan keiin setti qinalmai bitirýge bolatyn edi. Áitse de Zarina birneshe setboldy paidalana almady. Amerikalyq tennisshi tarazy basyn teńestirip úlgerdi. Degenmen Z.Diias qairatyna qaita minip, qatarynan qos geimdi ala bildi - 7:5.
Ekinshi partiiada da Zarina esesin jibermedi - 6:4.
Báseke eki saǵatqa jýyq ýaqytqa sozyldy.
Bul - tennisshilerdiń ózara úshinshi kezdesýi. Biyl Indian-Ýells dodasynda amerikalyq sportshy 6:1, 6:1 esebimen jeńgen bolatyn. Birneshe kún buryn osy Tsintsinnatide irikteý saiystarynyń finalynda úsh saǵatqa jýyq ýaqytqa sozylyp, asa tartysty ótken kezdesýde Zarina qarsylasyn tize búktirip, negizgi týrnirge joldama alǵan edi.
Z.Diias Tsintsinnati týrniriniń ekinshi ainalymynda álemniń 22-raketkasy, AQSh-tyń jas juldyzdarynyń biri, 1998 jyly Máskeýde dúniege kelgen Sofiia Keninmen sheberlik baiqasady.
