Qazaqstandyq Zarina Diias Japoniiadaǵy Hirosima WTA týrniriniń shirek finalyna shyǵa almady, dep habarlaidy "Ult aqparat".
Álemniń 80-inshi, osy jarystyń 6-raketkasy Z.Diias ekinshi ainalymda reitingte 146-oryndaǵy japoniialyq Nao Hibinomen kezdesti.
Birinshi partiiada N.Hibino aiqyn basymdylyq kórsetti – 6:1.
Ekinshi sette esep 2:3 bolǵan mezette Z.Diias jarysty jalǵastyrýdan bas tartty.
2017 jyly osy dodanyń jeńimpazy bolǵan qazaqstandyq tennisshi biyl dodany erte aiaqtady.
N.Hibino shirek finalda Hirosima týrniriniń ótken jylǵy jeńimpazy, biylǵy birinshi, álemniń 29-raketkasy, taibeilik Se Shývei nemese reitingte 123-oryndaǵy aýstraliialyq Pristsilla Honnyń bireýimen kortqa shyǵady.
Eske sala keteiik, budan buryn Zarina Diiastyń Hirosima týrnirin, al Elena Rybakinanyń Qytaidaǵy Nanchan jarysyn jeńispen bastaǵanyn jazǵan bolatynbyz.
Bul eki týrnirdiń de júlde qory – 250 myń AQSh dollary.
