«YouTube» videohostinginde koloniia qyzmetkerleriniń sottalǵandarǵa kúsh qoldanýy týraly materialdar jariialanǵannan keiin Almaty oblystyq qylmystyq-atqarý júiesi departamentiniń LA-155/8 mekemesine (Zarechnyi kenti) Ishki ister ministriniń tapsyrmasymen dereý komissiia jiberildi.
Qazirgi ýaqytta arnaiy komissiianyń jumysy jalǵasyp jatyr, dep habarlaidy QazAqparat tilshisi Ishki ister ministrligine silteme jasap.
«Qyzmettik tergeý nátijesi boiynsha tártiptik negizde atalǵan mekeme men Almaty oblystyq qylmystyq-atqarý júiesi departamentiniń 14 laýazymdy tulǵasy jazalandy» - dedi Ishki ister ministri Erlan Turǵymbaev.
Sonymen qatar, oǵash áreketteri úshin ishki ister organdarynan 7 qyzmetker, onyń ishinde 2 mekeme bastyǵynyń orynbasary jumystan shyǵaryldy. Tártiptik sipattaǵy sharalarmen qatar Almaty oblysynyń arnaiy prokýrorlar basqarmasy QR QK 146-baby 2-bóligi boiynsha qylmystyq isterdi tergeý aiasynda 7 qyzmetkerge qatysty tergeý izoliatoryna qamaýǵa alý túrindegi bultartpaý sharasyn taǵaiyndady. Munan bólek, mekeme bastyǵy jáne Almaty oblystyq qylmystyq-atqarý júiesi departamenti bastyǵynyń orynbasary qyzmetinen bosatyldy.
Ministr biylǵy jyldyń 24-25 sáýirinde Almaty oblystyq QAJ departamentiniń LA155/14 mekemesinde tintý is-sharalary faktisi boiynsha qyzmettik tekserý júrgizý barysy týraly atap ótti. Tekserý barysynda 30 uialy telefon, 16 zariadtaý qurylǵysy, 3 qulaqqap, 54 shanshý-kesetin zattar (bir ret qoldanylatyn stanoktyń júzi – 34, tyrnaqqa arnalǵan qysqyshtar – 5, qairalǵan metall zattar – 6, qaishy - 9), 50 azamattyq úlgidegi zattar, qoldan jasalǵan 2 qainatqysh tabylǵan. Osy fakti boiynsha qazirgi ýaqytta qyzmettik tekserý júrgizilip jatyr.
«QR Sybailas jemqorlyqqa qarsy is-qimyl agenttiginniń Almaty oblysy boiynsha departamenti sottalǵandardyń azaptaý týraly ótinishteri negizinde tergeý júrgizý ústinde.
Tekserý barysynda barlyq oqiǵalar qatysýshylardyń jáne olarǵa jol bergen adamdardyń is-áreketterine quqyqtyq baǵa beriletin bolady, - dep atap ótedi ministrlik.
