Eski "Zaporojets" kóligimen jol apatyna túsken pavlodarlyq zeinetker Efim Kýpin naýqas balalarǵa kómektesý úshin tórt million teńge aýdardy, - dep habarlaidy Tengrinews.kz tilshisi.
85 jastaǵy pavlodarlyq aqsaqal óziniń igi isin Instagram jelisinde jariialady.
"Maǵan kómektesken barshańyzǵa raqmet. Maǵan jinalǵan aqshanyń tórt million teńgesin muqtaj balalarǵa aýdardyq", - deidi zeinetker.
Videony qala turǵyny Nazimhan Nazymov óz paraqshasynda jariialady. Nazimhan zeinetker jol apatyna ushyraǵanda alǵashqylardyń biri bolyp kómektesip, esepshot ashqan.
"Men volonter de, bloger de emespin. Atanyń videosyn kezdeisoq kórdim. Qatty áser etti. Meniń jumysym apat bolǵan jerge jaqyn ornalasqandyqtan, Efim Nikitichti tez taýyp aldym. Ony úige aparyp, bankten esepshot ashyp, videoǵa túsirip, qala jurtshylyǵyna jiberdim. Az bolsa da kómektesip, biraz soma jinarmyz dep oilaǵanmyn. Biraq aqparat BAQ-ta tarap ketti", - deidi pavlodarlyq.
Zeinetkerge kómek retinde qazaqstandyqtardyń qansha aqsha jinaǵany aitylmady. Biraq zeinetker búlingen Toyota kóligin jóndeýge 4,1 million teńge tólep qoiǵan. Al qalǵan soma ýáde etilgendei naýqas balalardyń emine aýdaryldy.
"Efim Nikitich úsh balaǵa tórt million teńge aýdardy. Biraq bul bári emes, qalǵan aqshany erteń taǵy birneshe balaǵa aýdaramyz. Jeti balaǵa kómektesemiz dep otyr. Atany bulai isteýge eshkim májbúrlegen joq. Alaiaqtarǵa tap bolmas úshin balalaryń ata-anasyna habarlasyp jatyrmyz", - dedi Nazimov.
Dálel retinde er adam zeinetker Kýpinnen kómek alǵan balalardyń analary jibergen videony tirkegen. Pavlodarlyq áielderdiń biri Tbiliside em alyp jatqan kishkentai qyzyna Efim Nikitichten eki million teńge alǵanyn rastady.
21 qyrkúiekte sotta "Zaporojets" JKO boiynsha ákimshilik is qaraldy. Zeinetker jol júrý erejesin buzyp, kólik quralyna zaqym keltirgeni úshin kináli dep tanylyp, oǵan 20 ailyq eseptik kórsetkish kóleminde aiyppul salyndy. Jeńildikti esepke alǵanda jalpy soma 43 myń teńgege jýyqtady.
