AQSh-tyń Maiami qalasynda Amazon Prime Air kompaniiasyna arnalǵan júk ushaǵy qoný kezinde apatqa ushyrap, saldarynan keminde bes adam qaza tapty. Taǵy bes adam túrli jaraqatpen aýrýhanaǵa jetkizilgen. Úsheýiniń jaǵdaiy aýyr, dep habarlaidy ult.kz.
Oqiǵa 6 qyrkúiekte Maiami halyqaralyq áýejaiynda bolǵan. Prime Air-diń 7598 reisin 21 Air áýe kompaniiasy basqaratyn Boeing 767-300 júk ushaǵy oryndaǵan. Ushaq Pýerto-Rikodaǵy San-Hýan qalasynan Maiamige baǵyt alǵan.
Aldyn ala málimet boiynsha, ushaq qoný kezinde ushý-qoný jolaǵynan shyǵyp ketip, áýejai mańyndaǵy jolǵa ótip, birneshe kólikpen soqtyǵysqan. Soqtyǵystan keiin ushaqta órt shyqqan. Qutqarýshylar oqiǵa ornyna 60-tan astam arnaiy tehnika men júzdegen mamandy jumyldyrǵan.
Órt sóndirý qyzmetiniń málimetinshe, apat ornynda janarmaidyń aǵýy da baiqalǵan. Keibir adamdar kólikteriniń ishinde qalyp qoiǵan. Qutqarýshylar olardy arnaiy tehnikanyń kómegimen evakýatsiialaǵan. Ushaqtyń piloty men ekinshi piloty da kabinada qysylyp qalǵan.
Apattan keiin Maiami halyqaralyq áýejaiyndaǵy ushý jumystary ýaqytsha toqtatylyp, kóptegen reis keshiktirilgen nemese keiinge shegerilgen.
