Qytaidyń ońtústik-batysynda tolassyz jaýǵan nóser jańbyr aýyr zardaptarǵa ákeldi. Qatty jaýyn saldarynan úiler qirap, lai kóshkini júrip, keminde 10 adam kóz jumdy, dep habarlaidy ult.kz.
Bul týraly Qytaidyń memlekettik CCTV telearnasy habarlady.
Tabiǵi apattan eń kóp zardap shekken aimaqtardyń qatarynda Sychýan provintsiiasy men Gýansi óńiri bar. Sychýande jaýyn sýy jinalyp, aýyldaǵy úidiń shatyry men qabyrǵasy opyrylyp, bes adam qaza tapqan. Oqiǵa 18 tamyzda balalardyń joǵary oqý ornyna túsý nátijesin atap ótýge arnalǵan dastarhan kezinde bolǵan.
Budan bólek, Channin ýezindegi úidiń qulaýynan taǵy úsh adam kóz jumǵan. Taǵy eki adam aýrýhanada qaitys bolǵan. Apat saldarynan 17 adam jaraqat alyp, meditsinalyq kómekke júgingen.
Nóser jańbyr taýly aimaqtarda lai kóshkini qaýpin kúsheitip, keibir joldardyń jabylýyna sebep bolǵan. Ásirese Gantszy jáne Aba aimaqtarynda tabiǵi apattar tirkelgen.
Qytaidyń apattardyń aldyn alý jónindegi organdary qaýipsizdik maqsatynda Chendý, Tszygýn jáne basqa da aýdandardan 21 784 adamdy evakýatsiialaǵan.
Mamandar jańbyrdyń jalǵasýyna bailanysty óńirlerde jańa sý tasqyny men kóshkin qaýpi saqtalyp otyrǵanyn eskertti. Qutqarý qyzmetteri zardap shekken aýmaqtarda jumysyn jalǵastyryp jatyr.
