Foto: Aqordanyń baspasóz qyzmeti
Prezident Qasym-Jomart Toqaev «Zańsyz iemdenilgen aktivterdi memleketke qaitarý týraly» Zańǵa qol qoidy, dep habarlaidy "Ult aqparat" Aqordanyń resmi saityna silteme jasap.
«Memleket basshysy «Zańsyz iemdenilgen aktivterdi memleketke qaitarý týraly» jáne «Qazaqstan Respýblikasynyń keibir zańnamalyq aktilerine zańsyz iemdenilgen aktivterdi memleketke qaitarý máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoidy.
Zańnyń mátini baspasózde jariialanady» - delingen habarlamada.
Zań normalaryna sáikes qaitarý tetikteri iri sybailas jemqorlyq sýbektilerine jáne ákimshilik-bilik resýrstary (bailanystary, yqpaly) bar adamdarmen sybailas oligopoliialyq toptarǵa qoldanylady.
▪️Zań jaýapty memlekettik laýazymdy atqaratyn (atqarǵan) sýbektilerge, memlekettik zańdy tulǵalarǵa, kvazimemlekettik sektor sýbektilerine, sondai-aq atalǵan tulǵalarmen affilirlengen sýbektilerge qoldanylady.
▪️Zań erejelerin qoldaný úshin kórsetilgen kriteriilerge qosymsha tulǵalarda Zańda belgilengen shekti somadan – 13 mln. AEK-ten asatyn (44 mlrd. 850 mln. teńge nemese shamamen 100 mln. AQSh dollary) aktivteri bolýǵa tiis.
▪️Aktivterdi qaitarý jumystaryn arnaýly ýákiletti organ (Bas prokýratýra vedomstvosy) júzege asyrady. Ol memlekettik organdardyń aqparaty jáne zańnamada tyiym salynbaǵan basqa da kózder negizinde monitoring pen taldaý júrgizedi.
▪️Monitoring jáne taldaý barysynda aktivterdi zańsyz shyǵarý shemasyna qatysy bar tulǵalar toby, olarmen úlestes tulǵalar toby, aktivterdiń jiyntyq mólsheri, aktivterdi zańsyz iemdenýdiń, olardy elden tys jerge shyǵarýdyń belgileri men mán-jaiy jáne ózge de málimetter aiqyndalady.
▪️Taldaý qorytyndysy boiynsha, eger ýákiletti organda satyp alynǵan aktivterdiń zańdylyǵyna qatysty oryndy kúmán týyndasa, ol aktivterdi qaitarý jónindegi komissiiaǵa (Parlament depýtattarynan, qoǵam qairatkerlerinen, Úkimet múshelerinen, memlekettik organdardyń birinshi basshylarynan jáne ózge de tulǵalardan quralǵan komissiiany Premer-Ministr jasaqtaidy) osyndai sýbektiler men olardyń úlestes tulǵalaryn tiisti reestrge qosý týraly usynystar engizedi.
▪️Zańda ýákiletti organnyń oryndy kúmándanýyna negiz bolatyn kriteriiler naqty aiqyndalǵan. Bul – aktivter qunynyń zańdy kirister kólemine nemese aktivterdi iemdenýine, tulǵanyń nemese onyń úlestes tulǵalarynyń aktivterdi belgilengen shekten joǵary baǵada (jaýapty laýazymǵa ornalasý kezinde ne odan keiin) satyp alýyna arnalǵan shyǵystardy jabýdyń ózge de kózderine sáikes kelmeitin jáne Zańda belgilengen basqa da negizder.
▪️Komissiia tulǵalardy Reestrge engizý týraly sheshim qabyldaidy. Sondai-aq áleýmettik, saiasi jáne ekonomikalyq turaqtylyqty eskere otyryp, aktivterdi qaitarý jónindegi aldaǵy sharalar týraly sheshim qabyldaidy, qala quraýshy kásiporyndardyń aktivteri boiynsha usynymdar ázirleidi.
▪️Komissiia adamdardy Reestrge engizgen jaǵdaida, ýákiletti organ bul týraly olardy habardar etedi jáne osy sátten bastap tulǵalar aktivterdi iemdenýdiń zańdylyǵyn rastai otyryp, aktivter týraly deklaratsiiany tapsyra alady (bir ai ishinde ne 3 ai ishinde – qujattardy jinaý jáne daiyndaý úshin neǵurlym uzaq merzim qajet bolǵan jaǵdaida).
▪️Deklaratsiiada sýbektiler zańdy tulǵanyń kiristerin, aktivterin, jarǵylyq kapitalyna qatysý úlesterin, Qazaqstandaǵy jáne sheteldegi qaryzdardy, aktivterdiń shyǵý tegi týraly ózge de málimetterdi kórsetýge tiis.
▪️Eger tulǵa aktivterdi iemdenýdiń zańdylyǵyn rastai almasa, onda mundai aktivter shyǵý tegi túsiniksiz aktivter dep tanylady.
▪️Aktivti elden shyǵarý nemese ony ielikten shyǵarý qaýpi týyndaǵan kezde, ýákiletti organ aldyn alý sharalaryn qabyldaý týraly ótinishpen sotqa júginedi.
▪️Zańsyz iemdelingen aktivterdi qaitarý erikti túrde nemese Respýblikanyń, shet memleketterdiń sot aktileri nemese shet memleketterdiń quzyretti organdarynyń sheshimderi negizinde májbúrli túrde júzege asyrylýy múmkin.
▪️Sharttar aqsha tóleý, aktivterdiń bir bóligin nemese barlyǵyn memleketke qaitarý, sondai-aq tolyq alynbaǵan salyqtyń, keltirilgen zalaldyń, aktivterdi ielengen jalpy kezeń ishinde tulǵa tapqan tabystyń somasyn, biraq memleketke keltirilgen zalaldan kem emes somalardy jáne basqa da sharttardy qamtýy múmkin.
▪️Aktivterdi májbúrli túrde qaitarý ýákiletti organnyń sotqa júginýi arqyly azamattyq protsestik zańnama qaǵidalarynyń jalpy negizdemelerine sáikes júzege asyrylady.
▪️Zańda adal satyp alýshylardy qorǵaý tetikteri kózdelgen.
▪️Memleket paidasyna túsken aktivter Qarjy ministrligindegi qolma-qol aqshany baqylaý shoty sanalatyn Arnaýly memlekettik qorǵa beriledi. Qarajat Arnaýly memlekettik qordan áleýmettik, ekonomikalyq jobalardy qarjylandyrýǵa jumsalady.
▪️Aktivterdiń shetelde bolýy múmkin ekenin eskere otyryp, Zańda sottar sheshimderiniń oryndalýyn qamtamasyz etý, aqparat almasý jáne ózge de quqyqtyq ózara is-qimyldar úshin halyqaralyq quqyqtyq yntymaqtastyq tetikteri qarastyrylǵan.
▪️Ýákiletti organ jyl saiyn aktivterdi zańsyz iemdenýge jáne shyǵarýǵa qarsy is-qimyl, qabyldanǵan júieli sharalar, onyń ishinde resmi saitynda jariialanatyn aktivterdi zańsyz iemdenýge jáne shyǵarýǵa yqpal etetin sebepter men jaǵdailardy boldyrmaý sharalaryn qamtityn aqparat daiyndaidy.
▪️Mundai zańdardy qoldanysqa engizý jónindegi jalpy talaptarǵa sáikes, jariialanǵannan keiin 60 kún ótken soń qoldanysqa engiziletin azamattardyń quqyqtary men mindetterine qatysty erejelerdi qospaǵanda, Zań jariialanǵannan keiin 10 kún ótken soń qoldanysqa engiziledi.
