"Zańsyz búirek almastyrdy" dep kúdikke ilingen Shymkenttegi №1 qalalyq klinikalyq aýrýhanasynyń bas dárigeri Abylai Donbai eki aiǵa qamaldy. Bul týraly 21 qarasha kúni Azattyqqa Nur-Sultan qalalyq sotynyń ókili Botagóz Baianova aitty.
Botagóz Baianovanyń aitýynsha, 20 qarashada Nur-Sultan qalasynyń mamandandyrylǵan aýdanaralyq tergeý soty kúdikti Abylai Donbaidy eki ai merzimge qamaý týraly qaýly shyǵarǵan. Qaýly ázirge zańdy kúshine enbegen.
19 qarashada ishki ister ministrligi Abylai Donbaidyń ústinen Qylmystyq kodekstiń "Transulttyq qylmystyq top jumysyna aralasý" jáne "Adam múshelerin zańsyz saýdalaý" baby boiynsha qylmystyq is qozǵalǵanyn habarlaǵan. Vedomstvo Abylai Donbaidyń búirek almastyrý operatsiialaryn qomaqty qarjyǵa zańsyz jasaǵanyn málimdegen.
Shymkent qalalyq densaýlyq saqtaý basqarmasy baspasóz qyzmetiniń dereginshe, Abylai Donbai 2019 jyldyń naýryz aiynda Shymkenttegi №1 qalalyq klinikalyq aýrýhanasynyń bas dárigeri qyzmetine taǵaiyndalǵan.
Basqarma dereginshe, Shymkentte 2013 jyldan beri dárigerler búirek almastyrý operatsiiasyn jasai bastalǵan. 2014 jyldan bastap qazirge deiin 106 búirek almastyrylǵan. Qazirgi ýaqytta tórt naýqas týystarynyń búiregin transplantatsiialaýǵa daiyndalyp jatyr. Biraq Shymkent qalalyq qoǵamdyq densaýlyq saqtaý departamenti organdar men tinderdi transplantatsiialaýǵa sanaýly dárigerge ǵana ruqsat bergen.
Qazaqstan zańyna sai, qazaqstandyqtar sheteldikterge organ berýge tyiym salynǵan. Qazaqstan azamaty tek qazaqstandyqtarǵa organ bere alady.
