Aqmola oblysynyń Bestóbe kenishindegi shahtada altyn kenin zańsyz izdeýmen ainalysyp júrgender áli de bar. «Altynalmas AK» AQ-nyń basshylyǵy shahtaǵa óz betimen túsken adamdardyń ómirine alańdap otyr, dep habarlaidy QazAqparat.
««Altynalmas AK» AQ Bestóbe kenishiniń isten shyqqan altyn óndirý shahtasynda zańsyz altyn óndirýshilerdiń ólimge ushyraǵanyna alańdap otyr. Osyǵan bailanysty atalmysh shahtadaǵy zańsyz kenshilerdi shahtadan shuǵyl túrde shyǵýǵa shaqyrady.
Kompaniia Bestóbe kenishindegi shahtada altyndy zańsyz izdeýmen ainalysyp júrgenderdiń densaýlyǵy men ómiri úshin jaýap bermeidi.
Ótken aptada shahtada eki adamnyń máiiti, jaraqat alǵan 1 adam tabyldy. 22 shildede 655 metr tereńdikte jarylǵysh materialdardy tasymaldaýǵa arnalǵan arbada 1 adamnyń denesi tabylsa, 25 shildede 1 adamnyń máiiti men kóptegen jaraqaty bar adam tabyldy. Olar shahtada jasalǵan ruqsat etilmegen jarylys kezinde qulaǵan taý jynystarynyń astynda qalǵan. Zańsyz altyn izdeýshiler máiitterdi ken ornynyń qyzmetkerleri joǵary kóterip alýy úshin shahtanyń oqpanyna ákelgen. 25 shildede jer betine shyǵarylǵan zańsyz altyn izdeýshilerdiń biriniń aitýynsha, shahtada zańsyz kásippen ainalysatyn adamdar áli de bar.
Kompaniia qaitys bolǵandardyń otbasylaryna kóńil aityp, altyndy zańsyz óndirý zańǵa qaishy jáne ómirge asa qaýipti ekenin eske salady», - dedi vedomstvodan.
Osy rette, «Altynalmas AK» AQ-nyń baspasóz qyzmeti Qylmystyq kodekstiń 334-baby boiynsha jer qoinaýyn óz betinshe paidalanǵany úshin jaýapkershilik qarastyrylǵanyn, zań buzǵan adamdar 5 jylǵa deiin bas bostandyǵynan aiyrylýy múmkin ekenin eske salady. Al Qylmystyq kodekstiń 269-1-babynda kúzetiletin aimaqqa zańsyz kirgenderge 10 jylǵa deiin bas bostandyǵynan aiyrý túrindegi jaza eskerilgen. Osy kodekstiń 295-1-babyna sáikes baǵaly metaldar, asyl tastar, quramynda baǵaly metaldar bar shikizat taýarlaryn zańsyz saýdalaǵandar 7 jylǵa deiin túrmege qamalýy múmkin.
Eske salaiyq, 22 shildede Bestóbe altyn kenishinde er adamnyń denesi tabyldy. 25 shildede taǵy bir adamnyń máiiti men zardap shekken bir adam anyqtaldy. Olardyń barlyǵy bir jylǵa jýyq ýaqyttan beri toqtap turǵan shahtada altyn kenin zańsyz izdeýmen ainalysqan.
