Qazaqstanda zańǵa qaishy keletin 5700-den astam internet-resýrs buǵattaldy. Bul týraly Ishki ister ministrligi málimdedi, dep habarlaidy QazAqparat.
«Biz Internet jelisine zańǵa qarsy is-áreketterdi, balalardy azǵyrý, sýitsidtik oiyndar, buzýshylyqtar men qatygezdikke shaqyrý jáne jalǵan aqparatty taratýmen bailanysty aqparatty anyqtaý boiynsha únemi taldaý júrgizip otyramyz. Jyl basynan beri 7300 sheteldik internet-resýrstar anyqtaldy, onyń ishinde pornografiia, esirtki qylmysy, internet-kazino qyzmeti, qarjy piramidalary jáne basqa da alaiaqtyq shemalar, qatygezdik pen sýitsidti nasihattaý, qarý-jaraq satý jáne basqalary bar. Olardyń málimetteri Qazaqstan aýmaǵynan kirýdi buǵattaý úshin kiberbaqylaýdyń aqparattyq júiesine engizilgen. Qazirgi ýaqytta 5 736 resýrs buǵattaldy, qalǵandary tekserý satysynda tur», - dedi QR Ishki ister ministrligi Kriminaldyq politsiia departamentiniń kiberqylmyspen kúres ortalyǵy bastyǵynyń mindetin atqarýshy Rústem Dúisetaev Májilis komitetiniń otyrysynda.
Ol balalar men kámeletke tolmaǵandarǵa qatysty qylmystardy anyqtaýǵa erekshe nazar aýdarylatynyn atap ótti.
«Birneshe mysal keltireiin. 2020 jyly monitoring barysynda biz kámeletke tolmaǵan qazaqstandyqtarǵa qatysty sýitsidtik sipattaǵy top týraly aqparat aldyq. Jedel-izdestirý nátijesinde áleýmettik jelilerde osyndai toptar qurǵan Arys qalasynyń turǵyny ustaldy. Osylaisha «Jasyl mysyq» oiynyndaǵy 21 tapsyrmany oryndaý kerek bolǵan. Sońǵy tapsyrma ziiandy suiyqtyqtardy qoldaný, biik ǵimarattan sekirý jáne t.b. arqyly sýitsid jasaý bolǵan. Oiyn saldarynan ShQO-nyń 14 jastaǵy turǵyny zardap shekken. Qylmys anyqtalǵan kezde ol 14 tapsyrmany oryndaǵan edi. Osy jyldyń naýryz aiynda aýdandyq sot kúdiktini 4 jylǵa bas bostandyǵynan aiyrdy», - dedi Rústem Dúisetaev.
