Almatylyqtar endi tegin quqyqtyq kómek ala alady. Bul týraly búgin «Social project management» ortalyǵynyń direktory Beibit Moldahmetuly málimdedi. Almaty qalasy Qoǵamdyq damý basqarmasynyń qoldaýymen «Zań keńesi» jobasy óz jumysyn bastady, – dep habarlaidy «Ult aqparat».
Bul joba aiasynda qala turǵyndaryna zańdyq kómekter kórsetetin ortalyq qurylyp, memlekettik jáne orys tilderinde biryńǵai turaqty telefon nómiri bar «jedel jeli» jumysy iske qosylǵan. Ortalyqqa kelýshilerge zań máseleleri boiynsha aqparattyq konsýltatsiialar beriledi. Qaladaǵy barlyq aýdandarda jyljymaly mobildi zań qyzmetteri uiymdastyrylady. Azamattarǵa zańdyq qujattar (aryz, talap, ótinish jáne t.b.) daiyndaýda ádistemelik kómekter kórsetiledi.
«Búginde sotqa talap-aryz jazatyndar kóbeidi. Buǵan qarap quqyqtyq saýattyń artqanyn baiqai alamyz. Degenmen búginde quqyqtyq keńesti kez kelgen adam ala almaidy, áleýmettik jaǵdaiy tómen adamdar zańgerlerden aqyly keńes surai almaidy. Biz osy maqsatta qarapaiym halyqqa tiimdi bolý úshin arnaiy joba bastap otyrmyz. Bul jobanyń aty – «Zań keńesi» dep atalady. Úsh jylda iske asady. Osy joba aiasynda kez kelgen sanattaǵy Almaty qalasynyń turǵynyna quqyqtyq, zańdyq kómek kórsetemiz. Barlyǵy tegin, olardan eshqandai aqsha alynbaidy. Óitkeni jobany úkimettik emes uiym iske asyryp jatyr. Zańgerlerdiń, uiymdastyrýshylardyń aqysyn basqarma, ákimdik tólep otyr, – deidi «Social project management» ortalyǵynyń direktory Beibit Moldahmetuly.
Atalǵan joba Almaty qalasy Qoǵamdyq damý basqarmasynyń qoldaýymen júzege asyrylady. Úsh jylǵa bekitilgen qarjy kólemi de belgili.
«Bizde «Zań keńesi» jobasy memlekettik tapsyrys negizinde júzege asady. Qazirgi tańda 3 mln 400 myń teńgege osy jobany iske asyrý josparlanýda. Bul úsh jyldyq joba, jalpy 11 mln -ǵa jýyq qarjy bólingen», – deidi Almaty qalasy Qoǵamdyq damý basqarmasynyń bas mamany Aqbota Sadyq.
Joba jetekshileriniń aitýynsha, bólingen qarjy az bolǵandyqtan joba jeltoqsan aiyna deiin qysqasha jalǵasady. Qarjy jetpei jatqan jaidaida demeýshiler tartý da qarastyrylǵan. Joba BAQ ókilderine búgin tanystyrylǵanymen, shilde aiynan beri quqyqtyq kómek berýdi bastap ketken.
«Qoǵamda quqyqtyq, ákimshilik quqyq boiynsha, kredit máselesi, otbasylyq jaǵdai degen siiaqty ártúrli maqsatta suraqtar bolyp jatyr. Suraqtaryna jaýap berip, kómegimizdi berip jatyrmyz. Arestten sheship berý, aliment máselesi degen siiaqty. Qaryzyn tólemei júrgen boryshkerler óte kóp. Ázárge keńsemizde eki zańger jumys istep otyr, buiyrsa úshinshi maman qosylady. Biz onlain da, offlain da quqyqtyq kómek bere alamyz. Qajet adam saitqa jazyp kómek surasa da bolady, nemese keńsemizge kelip quqyqtyq máselelerin sheshýge kómek surai alady», – deidi «Zań keńesi» jobasynyń zańgeri Qýat Aýǵanbek.
Sonymen qatar zankomek.kz saity qurylyp, «Onlain keńesshi» interaktivti modýlderiniń kómegimen saitta memlekettik jáne orys tilderinde konsýltatsiialar júrgiziledi. Ol arqyly turǵyndar suraqtar qoiyp, zańgerlerden jaýap ala alady.
