Foto: Májilistiń baspasóz qyzmetinen
Búgin Májiliste «QR keibir zańnamalyq aktilerine áskeri-patriottyq tárbie máseleleri boiynsha tolyqtyrýlar engizý týraly» zań jobasynyń birinshi oqylym ótti, -dep habarlaidy Ult.kz.
QR Parlamenti Májilisiniń Halyqaralyq ister, qorǵanys jáne qaýipsizdik komitetiniń tóraiymy Aigúl Quspan:
"Otandy súiý, Otanǵa qyzmet etýdi bala kezden úiretý kerek. Alaida, búgingi kúni elimizde balalar men jastardyń patriottyq tárbiesi, iaǵni Otanǵa adal qyzmet etý, azamattyq borysh pen negizgi konstitýtsiialyq mindetterdi oryndaý zaman talaptaryna sai kelmeidi", -dep otyr.
Zań jobasy «Áskeri qyzmet týraly» Zańyn «áskeri-patriottyq tárbie», «áskeri-patriottyq tárbie júiesi» terminderiniń mazmunyn zańnamalyq turǵydan aiqyndaityn jańa bappen tolyqtyrady.
Sonymen qatar, osy norma respýblikalyq jáne óńirlik deńgeilerde Áskeri-patriottyq tárbie jónindegi úilestirý keńesterin qurýdy kózdeidi.
Keńesterdiń negizgi mindetteri tómendegidei:
- áskeri-patriottyq tárbieni damytý máseleleri boiynsha usynystar ázirleý;
- baǵdarlamalyq is-sharalardy uiymdastyrý barysynda azamattardy áskeri-patriottyq tárbieleýde barlyq múddeli memlekettik organdar men uiymdardyń jáne qoǵamdyq birlestikterdiń kúsh-jigeri men múmkindikterin biriktirý;
- jastardyń boiynda Qazaqstan armiiasynyń jaǵymdy beinesin qalyptastyrý úshin kórkem jáne derekti filmder jasaý, mýzyka jáne ádebi shyǵarmalar týdyrý, baspa ónimderin shyǵarý, telearnalarda áskerler týraly tsikldy habarlar júrgizý jáne áleýmettik jelilerde shynshyl aqparat berý.
"Áskeri-patriottyq tárbie máselelerinde úilestirilgen jáne kelisilgen jumysty is júzinde júzege asyrý úshin «Qorǵanys jáne Qarýly Kúshter týraly» Zańynda kózdelgen ortalyq jáne jergilikti atqarýshy organdardyń fýnktsiialaryna tiisti tolyqtyrýlar engizý usynylady.
Sondai-aq, «Memlekettik jastar saiasaty týraly» Zańyna mádeniet salasyndaǵy ýákiletti organnyń jastar uiymdarymen áskeri-patriottyq tárbie máseleleri boiynsha ózara is-qimyly men yntymaqtastyǵyn júzege asyrý bóliginde tolyqtyrý engiziledi.
Zań jobasyn qaraý barysynda depýtattar áskeri-patriottyq tárbieni jetildirýge, áskeri qyzmettiń bedeli men tartymdylyǵyn arttyrýǵa baǵyttalǵan birqatar túzetýlerdi usyndy.
Osyǵan bailanysty zań jobasy mazmundyq jáne tujyrymdamalyq jaǵynan birshama jaqsardy. Osy úshin ázirleýshiler atynan jumys tobynyń múshelerine jáne qatysty depýtattarǵa alǵys bildirgim keledi.
Qurmetti áriptester, Memleket basshysy 2023 jyly ótken Búkilarmiialyq keńeste jastarymyzdy otanshyldyqqa tárbieleýdiń qajet ekenin aitqany barshamyzdyń esimizde.
Usynylyp jatqan zań jobasy óskeleń urpaqty Otanymyzdyń naǵyz janashyryna ainaldyrýǵa, olardyń áskeri-patriottyq rýhyn arttyrýǵa áser etetini sózsiz. Osyǵan bailanysty ony qoldaýlaryńyzdy suraimyn", -deidi Aigúl Quspan.
