QR bala quqyqtary jónindegi ýákil Zaǵipa Bálieva Pavlodarda anasynan soqqy kórgen 3 jasar Ailinnyń oqiǵasyna qatysty pikir bildirdi, - dep habarlaidy kaz.tengrinews.kz tilshisi.
Zaǵipa Balievanyń aitýynsha, qazirgi ýaqytta tergeý jumystary júrgizilip jatqandyqtan, ol bul iske aralasa almai otyr. Ol qyzdy ázirshe ákesi men ájesine berýge bolatynyn aitady.
"Is materialdaryn zerttep bolmaiynsha, eshteńe aita almaimyn. Meniń qazir bul iske qatysýyma quqym joq. Qyz ýaqytsha balalar úiine berildi. Biraq men ony ata-anasy berý qajet dep oilaimyn. Onyń ákesi men ájesi bar. Sizder de osyndai jaǵdailardy biletin bolsańyzdar, maǵan aityńyzdar, materialdardy jiberińizder. Zertteimin, qajetti sharalardy qoldanamyn", - dedi bala quqyqtary jónindegi ýákil.
Sonymen qatar, ol qyzdy ózimen birge alyp ketýin usynǵan bolatyn. "Men balaǵa degen qamqorlyǵymdy bildirdim. Birden olarǵa qońyraý shaldym. Qyzdyń áke-sheshesi óz arasynda túsinistikke kelgenshe, men qyzdy ózimmen birge alyp ketýge usynys jasadym. Biraq maǵan qajetti sharalardyń qoldanylǵanyn aitty. Sol kúni-aq qyz balalar úiine jiberildi. Meni alańdatatyny - qyzdy balalar úiine apara jatqanda, ol qatty jylady. Anasynyń qasynan ketkisi kelmedi. Sebebi, qyz áli kishkentai, ol neniń jaqsy, neniń jaman ekenin bilmeidi. Ol úshin ana eń jaqyn adam", - dedi Bálieva.
Zaǵipa Bálievanyń aitýynsha, qazirgi ýaqytta Ailinmen psihologtar jumys istep jatyr. Qyzdyń kóńil-kúii jaqsy, durys tamaqtanyp júr.
"Balalar úiiniń barlyǵynda psihologtar jumys isteidi. Sáikesinshe, tárbieshiler de bar. Qazir qyzdyń kóńil-kúii jaqsy. Oinaidy, qatty erkelemeidi. Biraq ne degenmen, meniń oiymsha, qyzdyń ata-anasynyń qasynda bolýǵa quqy bar", - dedi jýrnalisterdiń qoiǵan suraǵyna Zaǵipa Bálieva.
Aita keteiik, osyǵan deiin úsh jasar qyzdyń Pavlodardaǵy balalar úiine berilgeni habarlanǵan edi. Aimaqtyq bilim basqarmasynyń málimetinshe, Ailin Qasymova qaladaǵy balalar úiine ornalastyrylǵan, al 8 jastaǵy ápkesi Aiǵanym ájesi men atasynyń qolyna berilgen.
Bilim basqarmasyndaǵylardyń aitýynsha, qyzdyń ákesi videodan áielin tanyǵan. 25 qazanda er adam Pavlodardaǵy IIB ortalyq politsiia bólimine aryz jazǵan. Aryzynda ol burynǵy áieli Nurgúl Dokýovaǵa qatysty shara qoldanýdy suraǵan. Er adam burynǵy áieliniń balalardy uryp-soǵý jaǵdaiy kóp bolatynyn aitqan.
Óz balasyn uryp-soǵyp, videoǵa túsirgen qatygez anaǵa qatysty is qozǵalǵany belgili. Búldirshindi anasynyń aiaýsyz uryp-soǵýy týraly video Instagram áleýmettik jelisinde jariia bolǵan edi. Kadrlardan áieldiń búldirshindi videoǵa túsire otyryp, betinen, basynan urǵanyn kórýge bolady. Keiin tamaǵynan qysyp, jylap jatqan balanyń únin óshirgisi keledi. Áiel munysymen de toqtamai, búldirshindi urǵylai beredi. Kadr syrtynda "Ana, toqtat!" degen taǵy bir qyzdyń daýsy estiledi. Qyz sheshesin toqtatpaq boaldy, biraq anasy onyń sózine qulaq aspaidy.
Keiin Pavlodarda qyzdy uryp-soqqan videony taratýshy oqiǵanyń mán-jaiyn aityp bergen edi.
