Qostanai oblysyndaǵy órtke sý tasityn kólikter tartylýy múmkin. Prezident Qasym-Jomart Toqaevqa jaǵdaidy baiandaǵan Tótenshe jaǵdailar ministri Iýrii Ilin osyndai málimet aitty, dep habarlaidy QazAqparat.
«Qazirgi tańda 5 ýchaskede órt sóndirý jumystary belsendi júrip jatyr. Buǵan deiin baiandaǵanymdai, negizgi ýchaskelerdegi eldi mekenderden 1800-den astam adam qaýipsiz jerge kóshirildi. Dál qazir evakýatsiialaý oryndarynda 66 adam bar. Qalǵandary ne qaýip seiilgendikten úilerine qaitty, ne týystarynda turyp jatyr», - dedi vedomstvo basshysy Qostanai oblysynda bolǵan órtti sóndirý jónindegi shuǵyl áreket etý shtabynyń otyrysynda.
Málim bolǵandai, Tótenshe jaǵdailar, Ishki ister jáne Qorǵanys ministrlikteri men Orman sharýashylyǵy komitetiniń ókilderinen, belsendilerden quralǵan eki myńnan astam adam órt sóndirýge jumyldyrylǵan.
«Qazirgi tańda 6 ushaq órt sóndirý jumystaryna tartylǵan. Onyń tórteýi Tótenshe jaǵdailar ministrligine, ekeýi Qorǵanys ministrligine tiesili, kúsh jetkilikti. Tek qazir sý kózderin izdeýde qiyndyqtar sezilýde. Qajet bolsa, sý tasityn kóliktermen qosymsha sý jetkizemiz. Óitkeni aǵash basyndaǵy jalyndy meilinshe tejeý úshin tikushaqtardy ýaqtyly sýmen qamtamasyz etý kerek. Osylaisha sanaýly kúnderdiń ishinde órtti tolyqtai aýyzdyqtaý josparlanyp otyr», - dedi ministr.
