IýNISEF basshysy 17 mamyrda "Úlken jetilik" (G7) pen Eýroodaqty kedei elderge koronavirýsqa qarsy vaktsina berýge shaqyrdy. Uiymnyń atqarýshy direktory Genriett Fordyń aitýynsha, COVAX baǵdarlamasy aiasynda qaiyrymdylyq jasaý "qazir mańyzdy bolyp turǵan eń qajetti shara" dep málimdedi. COVAX – kedei elderdi vaktsinamen qamtamasyz etý úshin qurylǵan ǵalamdyq baǵdarlama.
Fordyń sózine qaraǵanda, G7 jáne Eýroodaq elderi maýsym, shilde jáne tamyz ailarynda ózderinde bar vaktsinanyń 20 paiyzyn bólisken kúnniń ózinde 153 mln doza qaiyrymdylyq jasai alady jáne bul olarǵa óz halqyn vaktsinalaýǵa da bóget jasamaidy.
Fordyń málimdemesi Ulybritaniia koronavirýsqa bailanysty engizilgen shekteý sharalaryn jumsartýǵa daiyndalyp jatqan shaqta jariialandy. 17 mamyrdan bastap Ulybritaniianyń basym bóliginde turǵyndar, bar, pabtarǵa baryp, meiramhana ishinde tamaq ishe alady. Kino kórip, 30-ǵa deiin jinalǵan sharalarǵa qatysa alady.
Alaida premer-ministr Boris Djonson Úndistanda alǵash paida bolǵan koronavirýs túriniń taralyp jatqanyna alańdaýshylyq bildirip, britandyqtardy "óte saq bolýǵa" úndedi.
Osyǵan deiin Dúniejúzilik densaýlyq saqtaý uiymynyń (DDSU) basshysy Tedros Adhanom Gebreiesýs te aýqatty elderdi balalar men jasóspirimderge vaktsina salýdy shegere turyp, kedei elderdegi vaktsina tapshylyǵy máselesin sheshýge qol ushyn berýge úndegen.
